Daraasad cusub ayaa lagu sheegay in cudurka Covid-19 ee uu keeno jeermiska Corona uu ku faafi karo laguna kala qaadi karo hadalka iyo neefsashada.
Guddi Khubaro caafimaad ah oo si weyn loo qadariyo ayaa Aqalka cad ee Mareykanka u diray talo soo-jeedin ku saabsan Coronavirus, iyadoo caddeeyay in Jeermiska Corona aanu kaliya ku faafin qufaca iyo Hindhisyada laakiin uu ku faafi karo wadahadalka iyo neefsashada, waxayna tani xaaladda kasii dhigeysaa mid ka halis badan intii hore looga ogaa cudurkan.
Guddiga Akadeemiyada Qaran ee Sayniska oo uu madax u yahay Dr. Harvey Fineberg ayaa qoraal ay u direen Aqalka Cad waxay ku sheegeen in baaritaanka cusub ee ay ku ogaadeen inuu Coronavirus ku fidi karo wadahadalka iyo weliba neefsashada caadiga ah dadka isu jira ilaa 2 Mitir, iyagoo ku taliyey in maasgaraha wejiga lagu xirto ay adeegsadaan dadka marka ay dibadda u baxayaan.
Waxay kaloo arrintan ka danbeysay baaritaanno laga sameeyay isbitaallo ku yaalla Shiinaha iyo Mareykanka oo Virus-ka laga helay qolalka ay ku jiraan bukaanadda cudurku hayo meelo u jira 6 Feet (Laba Mitir), waxaana weli socda baaritaannada lagu hayo qaabka uu ku faafo Coronavirus si xowli ah uga socda dalalka Mareykanka, Spain iyo Talyaaniga.
Hore waxaa loo ogaa inuu Coronavirus ku faafo qufaca iyo hindhisada, waxaa kaloo lagu kala qaadi karaa taabashada, laakiin waxaa hadda lasii ogaanayaa in lagu kala qaadi karo neefsashada dadka isu dhow iyo wadahadalkooda.
