Haweeneydii ugu horeysay ee muslim ah ayaa dhowaan madaxweyne ka noqoneysa Dalka Singapore oo ka mida dalalka ugu qanisan dunida.
Xaliima Yacquub oo 63 jir ah, horena u soo noqotay Guddoomiyaha Baarlamaanka Dalkaasi ayaa noqotay musharaxa kaliya ee buuxiyay shuruudaha madaxweynaha Singapore laga rabo.
Haweeneydan ayaa u dhaxda nin asalkiisu yahay Yemani oo ganacsade ah laguna magacaabo Maxamed C/llaahi Xabashi, waxayna xilkan isu sharaxday bishii hore iyadoo noqotay musharax buuxiyay shuruudihii laga rabay oo dhan.
Dalka yar ee Singapore oo dadkiisu gaarayaan 6 milyan oo qof, waxaa muslimiin ah 14% oo kaliya, wuxuuna yahay dalka lixaad ee saldhigga dhaqaalaha adduunka, halka dakhliga qofkii soo gala uu yahay 90,000 oo doolar, wuxuuna ka qanisan yahay dalkan Faransiiska, Talyaaniga iyo Switzerland.
Arbacadda ayaa lagu wadaa inay noqoto madaxweynaha cusub ee Singapore, waxayna taasi ka dhigan tahay madaxweynihii labaad ee muslim ah ee dalkaasi madaxweyne ka noqda kadib Yuusuf Isxaaq oo dalkaasi madaxweyne kasoo noqday markii uu xoriyadda qaatay sanadkii 1965.
Madaxweynaha Singapore noqon doontaa muddo lix sanadood ah, asalkeedu waa Malay, saygeeda Yemaniga ah, isna hooyadiis waa Malay, waxay sanadkii 1978 ka baxday Jaamacadda Singapore iyadoo baratay cilimiga xuquuqda insaanka, iyadoo muddo 40 sano ah ka soo shaqeysay hay’adaha dowladda ee dalkaasi.
Waxay aad u jeceshahay kubadda cagta iyo cunto karinta, iyadoo si weyn looga yaqaan dalka Singapore, dalkan ayaa ah mid awoodda ay gacanta ugu jirto Golaha Wasiirada xukuumadda oo ku dhisan xisbiyo badan.
Haliima Yacquub iyo saygeeda
