Aamin Ambulance oo ah hay’adda ugu weyn gargaarka degdegga ah ee magaalada Muqdisho ayaa lagu amray inay shaqada joojiso ilaa amar dambe.
Amarkan ayaa shalay la gaarsiiyey mas’uuliyiinta Aamin Ambulance, kadib markii looga yeeray xarunta degmada Hodon ee magaalada Muqdisho oo saldhigeedu yahay, waxaana guddoomiyaha degmada Hodon uu ku wargeliyey in ilaa amar danbe aysan qaadi karin wax dhaawac ah, isla markaana aysan tegi karin goobaha ay qaraxyada ka dhacaan.
Wararka ayaa sheegay in amarkani uua kasoo baxay Taliska Booliska G/banaadir, kadibna lasoo mariyey degmada Hodon, waxayna xogta aanu helnay sheegeysaa in markii ay dalbadeen mas’uuliyiinta aAmin Ambulance in la siiyo amarka shaqo joojinta oo qoraal ah ay diideen mas’uuliyiinta degmada Hodon.
Guddoomiyaha Hay’ada Aamin Ambulance Dr. C/qaadir Cabdiraxmaan Xaaji Yuusuf ayaa hadda ku sugan dalka Ingiriiska, isagoo uga qeyb galaya seminar ku saabsan gargaarka degdega ah oo lagu casuumay.
Lama oga in amarkan gaar ku yahay dhammaan adeegyada gargaarka degdega ah iyo inuu ku kooban yahay Aamin Ambulanc, laakiin wuxuu daba socdaa amar kale oo lagu soo rogay warbaahinta, kaasoo ku saabsan inaysan tegi karin goobaha qaraxyadu ka dhacaan.
