Hay’adda Nabadsugidda iyo Sirdoonka NISA ayaa goor dhoweyd shaacisay inuu xilka la wareegay sarkaalkii uu xalay magacaabay Madaxweynaha xilkiisu dhammaaday ee Maxamed C/llaahi Farmaajo.
Qoraal kooban oo la dhigay barta Twitterka ee Hay’adda NISA ayaa lagu sheegay in munaasabad ka dhacday xarunta NISA uu xilkii kula wareegay G/Sare Yaasiin C/llaahi oo ahaa madaxa NISA ee Gobolka Banaadir.
“Waxaa Taliska Nabad Sugida & Sirdoonka Qaranka ka dhacday munaasibad uu xilka kula wareegay Taliyaha cusub ee Ku-meel-gaarka ah ee HSNQ, Gaashaanle Sare Yaasiin Cabdullaahi Maxamuud. Waxaan Alle uga rejaynaynaa in uu u fududeeyo masuuliyada culus ee uu Madaxweynaha JFS u igmaday” ayaa lagu yiri qoraalka kasoo baxay NISA.
Lama sheen cidda xilka ku wareejisay, iyadoo uu dalka ka maqan yahay Agaasimihii xilka laga qaaday ee Fahad Yaasiin, sidoo kale faahfaahin lagama bixin cidda Hay’adda NISA maamulkeeda sii heysay.
Waxaa xusid mudan in Hay’adda NISA aysan lahayn agaasime ku xigeeno intii loo magacaabay Fahad Yaasiin, taasoo ka dhigtay Hay’ad shaqsi uu maamulo.
