Iyadoo ay sii socdaan baacsiga dadkii ka dambeeyay inqilaabkii fashilmay ee ka dhacay dalka Turkiga
iyo dadkii ka qeyb qaatay ayaa wararkii ugu danbeeay ay sheegayana in la qabtay sarkaalkii ugu sareeyay ee arrintan lagu eedeeyay iyo kumanaan askari oo kale.
Wasiirka cadaaladda Bekir Bozdag ayaa sheegay in dadka la qabtay ay sare u dhaafeen 6000 ruux, wuxuuna intaasi ku daray inay weli socdaan howlaha lagu nadiifinayo ciidamada ayna sii kordhi karto tirada askarta iyo saraakiisha la xirayo.
Gobolka Waqooyiga ku yaala ee Denizli ayaa lagu xiray 52 sarjaal oo ay ku jiraan saraakiil sare, waxaana la hadal hayaa xariga laba jeneraal oo ka danbeeyay afgembiga.
Waxaa kaloo saraakiisha sare ee la xiray ka mida Gen. Erdal Ozturk, taliyaha ciidamada saddexaad iyo Gen. Adem Huduti, taliyaha ciidamada labaad, waxaa kaloo ka dhex muuqda Akin Ozturk, taliyihii hore ee ciidamada Cirka Turkiga.
Madaxweynah Turkiga Recep Tayyip Erdogan ayaa sheegay in baarlamaanka go’aan ka gaari doono in lasoo rogo ciqaabka dilka ah si loogu fuliyo dadkii ka dambeeyay inqilaabka.
Waxaa weli jidadka waaweyn iyo fagaarayaasha ka socda bannaanbaxyo waaweyn oo dadweynaha dalkaasi ku muujinayaan taageerada dowladda Turkiga.
Generaal Ozhan Ozbakir, oo ahaa taliyaha ciidamada Denizli iyo Batalyanka ciidamada 11aad ayaa ka mida saraakiisha sare ee la xiray sida ay shaacisay wakaalada wararka Turkiga ee Anadolu.
DAAWO SAWIRRO
Wadani.com
