Waxaa degaanka Xaluula ee degmada Warsheekh Gobolka Sh/Dhexe lagu aasay maanta hooyo iyo laba caruur ah oo isku qoys ahaa, kuwaas oo xalay lagu dilay weerar dabley ku qaaday Gurigooda.
Weerarka oo la sheegay inuu salka ku hayo aano qabiil, ayaa dhaliyey naxdin, isagoo dib u soo nooleeyay xiisadii beelaha degaankaasi oo dhowr jeer dagaallo beeleed dhex mareen.
Dadka la dilay ee isku qoyska ah ayaa kala ahaa: Safiyo Sheekh Abuukar Sheekh Cabdiraxmaan, Sangaabo Maxamuud Xuseen iyo Abuukar Iidow oo 10-sano jir ahaa.
Waxaa falkaas ka badbaaday hooyada dhashay Safiyo Sheekh Abuukar, oo wax yar kahor dilka ka tagtay goob ay ku wada sugnaayeen, dadkan ayaa lagu dilay Rasaas ooda loogu qaaday, waaana baxsaday dableydii falkaasi geysatay.
Falka kadib ayaa waxaa goobta ka baxsaday raggii hubeysnaa ee dilka Argagaxa leh u geystay qoyska, Dadkan ayaa sida la tilmaamay maalmo kahor xoolo u naq raacay ( Uraray) xaluule oo uu ka da’ay roob.
Maanta ayaa degaanka Xaluule lagu aasay dadkii xalay la dilay ee aanada qabiil loo laayey, iyadoo arrintan ay kusoo beegantay xilli xal laga gaaray dagaalkii beeleed ee degmada Cadalle, lagana soo saaray heshiis loogu digay dagaallada beeleed ee Sh/dhexe.
