Musharaxa xisbiga Dimoqraadiga Joe Biden oo goor dhow hadlay ayaa shaaciyay inuu rajo fiican ka qabo guul uu ka gaaro Doorashada madaxweynaha Mareykanka.
Biden oo ka hadlayey xarunta ololihiisa ee magaalada Delaware ayuu sheegay in rajadiisa ay fiican tahay, balse ay waqti qaadan doonto tirinta codadka doorashada, isla markaana ay qasab tahay in cod kasta la tiriyo, isagoo rajo ka muujiyey gobollada harsan ee aan weli lagu kala bixin.
Wuxuu tilmaamay in natiijada doorashada ay kaliya u taallo dadka Mareykanka, ayna sugi doonaan ilaa waqtiga ugu danbeeya, arrintan oo loogu talogalay in meesha looga saaro Guul uu si gaar u sheegto Donald Trump.
Dhinaca kale Madaxweyne Donald Trump ayaa sheegay inuu guul weyn rajeynayo, wuxuuna farriin uu soo dhigay bartiisa Twitter-ka ku caddeeyay in guul weyn ay gaareen, laakiin ay dhinaca kale doonayaan inay guushaasi ka xadaan, wuxuuna ka hor yimid in cod tirintu socoto kadib marka cod bixinta la soo xiro.
Arrintan dhibaatadu ka taagan tahay ee Trump iyo xisbigiisa Jamhuuriga ayaa ah inay diidan yihiin natiijo la sugo kadib marka lasoo xiro xarumaha cod bixinta maanta xilliga Mareykanka. Gobollada Pennyslivenia, Michigan, Wisconsin ayaa codadka lagu dhiibtay doorashada la tirinayaa kadib maalinta Doorashada, waxayna gaari kartaa ilaa Jimcaha soo socda.
Trump ayaa doonaya in meesha lag saaro codadka saddexda Gobol ee muhiimka u ah Musharaxa Dimoqraadiga, waxaana la saadaalinayaa in arirntu sii daba dheeraato, inkastoo Trump ku guuleystay Gobollada muhiimka ah ee Texas, Florida iyo Ohio.
Trump oo Saacad kadib hadli doona ayaa laga cabsi qabaa inuu ku dhawaaqo inuu ku guuleystay Doorashada Madaxweynaha Mareykanka markii labaad.
