Iyadoo ay dib u soo noolaaneyso xiisadii dalalka safka hore iyo ciidamada ka jooga Soomaaliya kadib qeylo dhaan ka timid Gobolka Gedo oo ku saabsan dhul balaarsi ay Kenya ka wado degmada Buuloxaawo ayaa xildhibaanada Baarlamaanka Federaalka waxay bilaabeen kacaan cusub oo ku saabsan in ciidamada Kenya laga saaro dalka.
Gudoomiye ku xigeen guddiga arimaha guduha Baarlamaanka Soomaliya Daahir Amiin Jesow ayaa ku doodaya ciidamada Kenya iyo Itoobiya aysan sharciyad ay ku joogin dalka Soomaaliya ayna dano gaara ka leeyihiin dalka iyadoo Baarlamanakii hore iyo kan hada jirana aysan ogolaansho ka heysan inay soomaaliya soo galaan.
Wuxuu intaas ku daray in Baarlamaanka Soomaaliya laga doonayo inuu soo saaro qaraar ku saabsan in ciidamada Kenya laga saaro Soomaaliya, mar hadii ay dhul boob ku hayaan dalkeena aanay suuragal ahayn inay na difaacaan.
Dowladda Kenya ayaa qaaday tallaabooyin dhowr ah oo shaki gelinaya danaha u qarsoon ee ay Soomaaliya la leedahay, waxayna dhinac ka sheegatay Badda Soomaaliya oo dacwad ka furan tahay maxkamada cadaaladda adduunka, dhinaca kale waxay Derbi ka dhiseysaa xuduudka Soomaaliya iyadoo gudaha u soo gashay dhulkii xuduudka beenaadka ahaa, halka dhinaca kale ay saaxiib la tahay maamulda iyo dowladda Federaalka oo ciidamadeedu ka mid yihiin AMISOM.
Waxaa isa soo taraya kacdoon ay wadaan xildhibaanada Baarlamaanka oo mar kale dhibaato weyn ku keenaya xiriirka mugdigu ku jiro ee dowladda Kenya iyo Soomaaliya, iyadoo xukuumadda iyo madaxtooyada ay u soo baxday shaqo kale oo ah inay difaacaan Kenya si aanu xiriirku u xumaan.
Wadani.com
