Iyadoo ay iska soo daba dhacayaan fadeexado isugu jira ku takrifal awood iyo musuqmaasuq kadib baaritaan hanti dhowrka guud ee Qaranka iyo Xeer ilaaliyaha ku sameeyeen wasiiro iyo hay’adaha dowladda Federaalka Soomaaliya ayaa xogta ay Goobjooge.com heshay ay sheegeysaa in laba ka mida wasiirada xukuumadda kalsoonida ka weysay Baarlamaanka Soomaaliya 6-dii Bishan ay noqdeen kuwa ugu badan ee ku takri falay awooda wasaaradihii loo dhiibay.

Labadan wasiir waxay kala yihiin:

1. WASIIRKA ARRIMAHA GUDAHA IYO FEDERAALKA C/LAAHI GOODAX BARRE:

Wasiirkan oo safka hore uga jira wasiirada musuqa ugu badan lagu soo calaamadeeday, waxaa u wehliyay shaqaaleyn tiro la yaab leh oo wasaaradda arimaha gudaha uu ku soo daray intii uu wasiirka ka ahaa. Shaqaalaha caadiga ah ee uu qoray intii uu wasiirka ahaa kuna meeleeyay wasaaradiisa waxaa lagu qiyaasay in ku dhow 60 qof, tiradaas 40 ka mida waxaa lasoo weriyay inay yihiin kuwo ay jufo hoose isku yihiin.

C/llaahi Goodax oo ka mida wasiirada taageeray madaxweynaha waxyaabaha lagu xasuusan doono waxaa ka mida inuu xoghaye katirsan maamulka Gobolka Banaadir u magacaabay nin walaalkiis ah, wuxuu kaloo la-taliyeyaal isaga uu leeyahay u magacaabay 4 ruux oo ay isku beel yihiin, waxaa kaloo aan qormadan quseynin musuqmaasuqa iyo dhinaca leexsiga deeqaha loogu talogalay gobolada dalka.

2. WASIIRKA DHALINYARADA IYO ISBOORTIGA KHAALID CUMAR CALI

Wasiirkan oo kaalin weyn ku leh dhismaha maamul goboleedka saddexda gobol ee Koonfur Galbeed, waxay xogta iyo baaritaanada tilmaameen inuu ku fogaaday shaqaaleynta beeshiisa, isagoo wasaarada uu maamulo intii uu yimid la sheegay inuu shaqaale u qoray in ka badan 30 xubnood, waxaana jira kuwo ka badan oo aan shaqaale la qaatay ahayn balse dulsaar ku ah kuwii hore.

Wasiir Khaalid marka la eego agaasimyaasha wasaaradiisa inta badan waa kuwo uu isagu dib ka magacaabay, waxaana lagu tiriyaa inay  wasaaradu noqotay mid beeleed. Waxay kaloo baaritaanadu sheegayaan inuu jiro xarun uu sameeyay oo tababaro bixisa si shaqsi ahna uu isagu u maamulo.