War kasoo baxay xafiiska Madaxweynaha Puntland ayaa lagu sheegay in xal laga gaaray khilaafii iyo kala aragti duwanaashihii u dhexeeyay Madaxweynaha iyo Madaxweyne ku-xigeenka Puntland.
Kadib Kulan ka dhacay Madaxtooyada Puntland oo ay ka qeyb galeen Madaxweynaha Puntland Siciid Cabdullaahi Deni, Madaxweyne ku-xigeenka Axmed Cilmi Cismaan Karaash, Guddoomiyaha Baarlamaanka C/rashiid Yuusuf Jibriil Cawl, Guddoomiye ku-xigeenka kowaad Cabdicasiis Cabdullaahi Cismaan, Guddoomiye ku-xigeenka Labaad ee Ismaaciil Maxamed Warsame iyo hoggaanka dhaqanka Puntland ayaa lagu shaacyey in laga gudbay khilaafkii labada mas’uul ee sareeya Puntland.
“Kulanka ayaa looga hadlay kawada shaqeynta midnimada, amniga iyo horumarka Puntland waxaana lagu guuleystay in meesha laga saaro kala aragti duwanaan dhinaca maamulka iyo shaqada ah oo u dhexeysay Madaxweynaha iyo Madaxweyne ku-xigeenka.Dowladdu waxay Bulshada Puntland ugu baaqaysa inay ka shaqeeyaan dowladdnimada, meel ugasoo wadajeestaan cadowga, iskana ilaaliyaan waxkasta oo khalkhalgelinaya nidaamka , amniga iyo jiritaanka Puntland…” ayaa lagu yiri qoraalka kasoo baxay Madaxtooyada Puntland.
