Laba ka mida gacan-yareyaasha iyo saaxiibada Ra’iisal wasaaraha xukuumadda xilgaarsiinta Maxamed Xuseen Rooble iyo Madaxweynaha xilkiisu dhammaaday Maxamed C/llahi Farmaajo ayaa waayey kuraas xildhibaan oo ay doonayeen inay kusoo baxaan.
Kursiga HOP072: Waxaa maanta kusoo baxay Xildhibaan C/rashiid Maxamed Xiddig oo hor ugu fadhiyey, isagoo helay 75 cod, waxaana la tartamay C/samad Maxamed C/laahi oo helay 18 cod.
Kursigan waxaa laga xirtay oo laga reebay sida u usheegay Cabdi Cali Raage oo ah L-taliyaha dhinaca Doorashooyinka ee Maxamed Farmaajo. Cabdi Raage aya sheegay in loo diiday warqadda Denbi la’aanta, kursigana si sharci darro ah loogu xiray qof uu wato Axmed Madoobe (Halkan ka Akhriso)
Kursiga HOP079: waxaa isna maanta kusoo baxay Maxamuud Muxumed Cumar (Kuulow) oo helay codad gaaraya 74, halka Bashiir Nuur Dhuumaal oo la tartamay uu ka helay 21 cod. Waxaa hore kursiga ugu fadhiday Farxiyo Xasan Axmed.
Kursiga HOP079 waxaa u sharxanaa oo laga xirtay Wasiiru Dowlaha Xafiiska Ra’iisul Wasaaraha C/xakiin Xasan Ashkir, Madaxweynaha Jubbaland ayaa ku adkeystay musharaxa uu watay ee maanta kusoo baxay kursiga, wuxuuna dadaalkiisii ku dhammaaday inuu isaga haro.
Kuraasta Golaha shacabka waxaa xilligan 2022 maamulaya madaxda maamul Goboleedyada, waxaana u gacan gashay Doorashadii Dadbaneyd, iyadoo aanu soo bixi karin cid ka baxsan musharixiinta ay wataan madaxdaasi.
