Maxkamadda Gobolka Galgaduud ee magaalada Dhuusamareeb ayaa soo saartay xukun ay ku beri yeeshay Macalin Dugsi Qur’aan oo lagu eedeeyay inuu kufsaday gabdho yaryar, kadib baaritaan lagu sameeyay gabdhaha.
Kiiskan oo markii ugu horeysay ay faafisay taliye ku-xigeenka Booliska Soomaaliya Gen. Zakiya Xuseen Amxed qoraalkeeda ku tiri: “Taliska Boliiska Galmudug gaar ahaan saldhiga degmada Dhusamareeb ayaa ku guuleystay soo qabashada Edeysane Shuceyb Cabdi Maxamuud 27 jir macalin dugsi ah oo 3 gabdho oo labo ay yihiin 9 jir midna ay tahay 7 jir kufsi u geystay”.”
18-kii Bishan ayey Maxkamadda Galgaduud caddeysay in baaritaan dheer ka dib kiiska uu been abuur noqday, waxaana gabdhaha yaryar ee la sheegay in la kufsaday loo diray isbitaallo caddeeyay inaysan jirin kufsi ah oo loo geystay; kadibna la fasaxay Macalinkii, waxaana shir jaraa’id qabtay hooyooyinka gabdhaha oo raaligelin macalinkoodii dugsiga Quraanka.
Macalin Shuceyb Cabdi Maxamuud oo kamid ah macaliinta Qur’aanka ee Magaalada Dhuusamareeb ayaa sheegay in wixii ku dhacay ay qadar ahayd, isla markaana uu cafiyey dadkii ka danbeeyay beenta laga faafiyay.
Taliye ku-xigeenka Booliska Soomaaliya Gen. Zakia ayaa faafisay kiiskan, isagoo aan caddeyn, waxayna dad badan aaminsan yihiin in arrimahan ay yihiin qosheyaal lagu doonayo in lagu weerarro macalimiinta Diinte ee Dugsiyada Qur’aanka.
