Kulankii Baarlamaanka ee maanta ayaa u baaqday kooram la’aan, kadib markii ay soo xaadiri waayeen tirada kooramka looga baahnaa xildhibaannada Baarlamaanka.
Xildhinaannada oo maanta u balansanaa doodda socota eeĀ xeer-hoosaadka Golaha shacabka oo qabyo ahayd. Wuxuuna kulankii 7-aad ee kalfadhiga afaraad la soo xiray markii soo xaadiri waayeen xildhibanno kooram dhan.
Waxaa soo xaadiray kulanka maanta 120 mudane, iyadoo ay Baaralmaanka u diiwaangashan yihiin 273 Mudane oo intooda badan ay ku sugan yihiin magaalada Muqdisho.
Gudoomiyaha Baarlamaanka Maxamed Sheekh Mursal ayaa amray in la akhriyo xildhibaannada ka maqan kulankii maanta, wuxuuna sheegay inaan la aqbali karin in xildhibaanno jooga magalada Muqdisho ay ka maqnaadaan, wuxuuna caddeeyay in 16 xildhibaan ay fasax ku maqan yihiin, iyadoo ku dhowaad 140 mudane ay sabab la’aan u maqnaayeen.
Xildhibaannada ayaa intooda badan xaadiray xilliyada ay jiraan doorashada iyo mooshinnada, laakiin waxay ka baaqsadaan kulamada caadiga ah ee Baarlamaanka, taasoo su’aalo badan laga keenay hab dhaqankooda iyo cidda ay tahay inay la xisaabtanto.
