Guddiga Doorashada Dadban ayaa joojiyay kursi ka mida kuraasta Aqalka hoose ee Baarlamaanka oo la filayay in shalay lagu doorto magaalada Cadaado.
Kursigan oo muran badan ka taagnaa ayaa ah kursiga labaad ee jufada Habar ceyno ee Beesha Murusade, waxaana musharixiinta ku tartamaya ay kala yihiin:
1. Maxamed Maxamuud Guurre
2. Sakariye Maxamed Cosoble
3. Cabdiqaadir Nuur Carraale
4. Cabdiqaadir Gaafow Maxamuud
Muran weyn ayaa hareeyay kursigan iyadoo la isu adeegsaday awood ciidan taasoo ay ugu wacan tahay nin la dhashay taliyaha NISA C/llaahi Gaafow Maxamuud oo ka mida musharixinta.
Guddiga Doorashada ayaa caddeeyay inay hakiyeen arrinta kursigan oo baaritaan ay wadaan, sida ay ku sheegeen qoraal ay xalay soo dhigeen bartooda twitterka.
Waxaan dib u dhignay Kursi yaal Cadaado oo loo tartami lahaa khilaaf doorashada la xariira awgeed. Baaritaan baa socda #Doorashada2016
— Doorashada2016 (@doorashada2016) November 16, 2016
Falkii lagu xiray wasiirka howlaha guud ee Galmudug Maxamed Maxamuud Guurre ayaa isna salka ku haya muranka ka taagan kursiga, waxaana socda baaritaan ku saabsan falkan kadib markii uu wareegto soo saaray madaxweyne kuxigeenka Galmudug.
Wadani.com
