Xukuumadda Soomaaliya ayaa shaacisay in lacag aan la fileyn oo dheeraad ah ay ka soo xerootay cashuurta Qaadka kadib markii isbedel lagu sameeyay saraakiishii wasaaradda Maaliyadda.
Laba maalmoo ay oo ay howlgaleen saraakiisha cusub ee la magacaabay ayaa la sheegay inay soo xareeyeen lacag canshuurta Qaadka ah oo dheeraad ah, taasoo gaareysa $34,000 ($17,000 maalintii).
Ra’iisal wasaaraha oo ay la socdaan wasiiro dhowr ah ayaa maanta booqday Dekadda iyo Garoonka Muqdisho si ay u dhiirigeliyaan saraakiisha maamulka cusub ee canshuuraha wasaaradda Maaliyadda, waxaana arrintan ka dhalatay su’aal ah cidda qaadan jirtay lacagtan.
“Maanta oo aan booqanay Furdada gegida dayuuradaha ee Adde Adde ayaan dhiirigelinay saraakiisha Furdada ee Wasaarada Maaliyada oo suurtogeliyey in maamulka cusub oo labo cisho joogo inuu ururiyey canshuur ka badan $ 130,000 oo ka muuqda koror $34,000 oo labo cisho lagu badbaadiyey, lacagta baaqatay labo cisho waxey bishii noqon kartaa $510,000.00 oo in ka badan 5000 ciidan mushaar lagu siin karay” ayuu yiri wasiirka warfaafinta xukuumadda Soomaaliya C/raxmaan Tariisow oo intaas ku daray in Musuqmaasuqa uu la degey dalka.
Saraakiisha xilalka laga qaaday ee Furdada iyo Garoonka Diyaaradaha ayaa la sheegay inay ahaayeen kuwo ku xiddideystay ilaha dhaqaalaha dalka oo si toos ah u maamulan jiray, hanti badanna ka yeeshay iyaga mas’uuliyiin kula shirko ahaa.
Wadani.com
