Qoraal kasoo baxay maamulka Gobolka Banaadir ayaa sheegay in sababta ay u baaqatay Ciyaartii kama dambeysta ahayd ee final-ka koobka Kubadda Cagta degmooyinka G/Banaadir oo ay caawa isaga hor imaan lahaayeen degmooyinka Waaberi iyo Dharkeynley,
Ciyaartan oo kumanaan qof u diyaar garoobeen, siina tageen Garoonka Ex. Koonis ee Yariisow, ayaa Maamulka Gobolka Banaadir uu sheegay inuu ka xun yahay dib u dhaca ku yimid ciyaarta oo ahayd cilad farsamo, wuxuuna sheegay in waqti dhow la qaban doono, iyadoo aan la shaacin waqtiga kale ee ay dhici doonto.
“Waxay ahayd in ay caawa dhacdo ciyaarta kama dambeysta ah ee tartanka ciyaaraha kubadda cagta ee Degmooyinka Gobolka Banaadir sidaas darteed inagoo ka xun dib u dhaca ku yimid cillad farsamo awgeed waxan la wadaageynaa bulshada Soomaaliyeed in waqti dhaw la qaban doono tartankaas, Waqtigaas oo aan dib ka soo sheegi doono” ayaa lagu yiri qoraalka ka soo baxay Maamulka Gobolka Banaadir
Caawa ayaa mar kaliya waxaa tegay korontadii Garoonka Ciyaaraha 7:00 fiidnimo oo ciyaarta la filayey inay bilaabato, waxaana ay maqneyd muddo saacad ah, waxaana markaas kadib cod baahiyaha dadka looga sheegay inay baaqatay ciyaartii.
Boqolaal dadweynaha ayaa oo Garoonka u tegay ciyaarta fiinaalka degmooyinka Waabari iyo Dharkeenley ayaa muddo ku sugnaa garoonka, iyagoo ka xumaaday qaabka ay ku baaqatay ciyaarta.
