Saaka sidii lagu balansanaa xildhibaananda baarlamaanka ayaa ku ururay xarunta Barlamaanka si loo qabto shirkii uu iclaamiyay Guddoomiyaha Baarlamaanka Prof Maxamed Sheekh Cusmaan (Jawaari), isla markii hoolka shirka la yimid waxaa marka hore loo diiday inay gudaha galaan saxaafadda oo amarkaasi uu bixiyay guddoomiyaha, waxaa kaloo la xiray dhammaan wadooyinka soo gala xarunta baarlamaanka.
Waxaa lagu arkay qoraalkii mooshinkii oo la dhigay, qaar kalena ay wataan xildhibaannada taageersan mooshinka oo iyaga gacantooda ku qaatay amarka ah inay qeybiyaan mooshinka. Xildhibaanada ka soo horjeeda mooshinka ayaa tallaabo kale qaaday waxayna jarjareen oo jeexjeexeen waraaqihii mooshinka ee hoolka lagu arkay.
Mar kale shaqaalaha baarlamaanka ayaa isku dayay inay qeybiyaan mooshinka waxaana gacanta ual tegay oo jeexjeexay xildhibaanadii ka soo horjeeday mooshinka, xarunta baarlamaanka ayaa noqotay meel waraaqo miiran ah.
Wasiir ku xigeenka arrimaha dibadda Mahad Maxamed Salaad oo ka mida xisbiga madaxweynaha dadka ugu firfircoon ayaa shirka la yimid kartoono ay ka buuxaan qoraalada mooshinka, wuxuuna ku qeybiyay xarunta Baarlamaanka, iyadoo xildhibaanadii ka horjeeday ayna dhinacooda ka bilaabeen inay jeexjeexaan qoraalka mooshinka. Waxaa kaloo socda soo bandhigidda qoraalo ka dhan ah mooshinka iyo madaxweynaha oo ay wataan xildhibaannada ka horjeeda mooshinka.
Arrimahan oo dhami waxay shirka ka dhacayaan iyadoo aanu furmin, lana xaadirin xildhibaannada, waxayna muujineysaa sida ay faraha uga baxeen nidaamkii iyo hogaankii shirka Baarlamaanka.
11: 45 Guddoomiyaha Baarlamanka ayaa hadda soo galay Xarunta baarlamaanka, wuxuuna isku dayi doonaa inuu furo shirka iyadoo ay sugayaan xildhibaanno u diyaara…
11: 55 Waxaa xarunta baarlamaanka hadda ka bilowday buuqii iyo sawaxantii ay wadaan xildhibaanada ka horjeeda mooshinka laga keenay Ra’iisal wasaaraha oo la istaagay sawaxan iyagoo qaadaya “Soomaaliyeey toosoo”.
Guddoomiyaha Baarlamaanka ayaa ka codsanaya xildhbaanada inay fariistaan oo aamusaan, laakiin sawaxankii waa ka sii daray…
12:05 Kadib sawaxan iyo buuq joogsan waayay ayuu guddoomiyaha ka baxay fadhiga isagoo aaday xafiiskiisa gudaha baarlamaanka, lamana oga inuu soo noqon doono iyo tallaabada uu qaadi doono.
12:35 Waxaa hoolka ku haray xildhibaanada diidan mooshinka ee taageersan Ra’iisal wasaaraha, waxayna sheegeen inay halkaas ku qadeyn doonaan, isla markaana galabta soo afjari doonaan joogistooda xarunta Baarlamaanka; iyadoo guddoonka Baarlamaanku aanu dib u soo laaban, waxaana laga war sugayaa talaabada xigta ee la qaadi doono kadib saddex isku day oo fashilmay.
WAXAA HALKAN KUSOO GUNAANADEYNAA TEBINTII TOOSKA AHAYD EE MAANTA IYO MADASHA BAARLAMAANKA MAHADSANIDIIN
Goobjooge.com
Muqdisho
[ad name=”HTML”]
