Maxamed Ibraahim Macallimuu oo shaaciyey inuu weli u taagan yahay kursi ka mida Golaha Shacabka, kana sheekeeyay qarixii qabsaday
Afhayeenka xukuumadda Soomaaliya,Maxamed Ibraahim Macallimuu ayaa faahfaahin ka bixiyay Qaraxii is-miidaminta ahaa ee lala beegsaday 16-kii January, kana dhacay magaalada Muqdisho.
Macallimuu ayaa sheegay in sida qaraxa u weynaa iyo fogaanta dhow ee uu u jiray qofka is-miidaamiyaha ahaa ee doonayey inuu dilo, ay tahay wax mucjiso ah sida uu uga badbaaday Qaraxaasi oo Alshabaab ay sheegatay.
“Waxaan ka jabay bowdada midig iyo gacanta, firirna jirka ayuu iga galay. Hadda waxaan isku dayaa in aan socdo, maalinba maalinta ka dambeysa xaaladeydu way soo fiicnaaneysaa,” ayuu yiri Macallimuu oo xaaladdiisa caafimaad soo hagaagaysa, laguna daweynayay isbitaal ku yaalla magaalada Istanbul ee dalka Turkiga..
Isagoo ka hadlayey xilliga uu qaraxu qabsaday ayuu yiri: “Markii aan gurigeyga ka soo baxayay waxaan ahaa qof faraxsan oo shaqadiisa u socda, laakiin sekeno gudahood ayay xaaladdu is bedashay. Markaan gaariga saartay laptop-kii aan watay ayaa waxaan arkay xariga kabta oo iga furan. Anigoo xiranaya ayaa waxaan arkay qof isa soo maqiiqay oo meel aan fogeyn soo cararaya. Waxaan xusuustaa in albaabka gaariga qeybtiisa dambe aan ku riixay oo aan jug ku siiyay. Laakiin xoog iyo xeelad qofkaa looga baxsan karay ma jirin ee awoodda Alle ayaa i badbaadisay,”.
Macalimuu ayaa sheegay in markii uu qaraxa dhacay kadib ay niyadiisa u sheegtay in ugu yaraan qeyb kamid ah jirkiisa uu ka go’ay. “Markii uu qaraxa dhacay dhulkaan ku dhacay. Qiiq madow iyo uuro ayaa afka iga buuxiyay. Markii hore waxaan is lahaa ugu yaraan qeyb kamid ah jirkaaga ayaa maqan, laakiin markii aan dhulka ku dhacay ayaan gacanta isku hubiyay. Alxamdullilah, waxaan arkay inuu jirkeyga taam yahay,” ayuu yiri Maxamed Ibraahim Macallimuu oo soo noqday Weriye u soo shaqeeyay warbaahin ay BBC-da ka mid tahay.
“Dhul kale ma qabo oo aan Soomaaliya ahayn. Anigoo intaan ka dhalinyar ayaan soo maray caasimadaha 15 dal oo Yurub ah, qaarkoodna aan ka soo shaqeeyay, weligeyna kuma fekerin in aan is dhiibo,” ayaa ka mid ahaa wareysi uu afhayeenka dhaawacnmay ee xukuumadda Soomaaliya uu siyey BBCSomali.
Maxamed Ibraahim Macallimuu ayaa sheegay in uu weli u taagan yahay kursi kamid ah Golaha Shacabka ee baarlamaanka Soomaaliya oo deegaan doorashadiisu tahay Hirshabelle.
