Madaxdii iyo shaqaalihii Waaxda Canshuuraha Dekadda weyn ee magaalada Muqdisho ayaa caawa habeenkii koowaad xabsi ku hoyanaya kadib markii galabta ay soo xireen ciidamada Booliska.
Dadka la xiray waxaa ka mida madixii Canshuuraha Dekadda Muqdisho Axmed C/llaahi Samow oo caawa tegay xarunta CID-da, halkaasoo isna lagu xiray oo lagu biiriyey shaqaalaha kale ee xafiiskiisa oo iyaduna ku xiran xarunta CID-da, iyadoo la sheegay in maxkamad la soo taagi doono, loona heysto kiis ku saabsan musuqmaasuq.
Wararkii ugu danbeeyay ayaa sheegaya in dekadda Muqdisho loo magacaabay Mas’uul KMG oo sii wada howshii Madaxa Canshuuraha Dekedda Muqdisho, waxaana xilkaasi sii heyn doona Maxamuud Maxamed Guure oo ahaa Madaxa Qiimeynta Kastamka Canshuuraha Dekedda Muqdisho.
