Madaxweynaha Maamulka Hirshabeelle Cali C/llaahi Cosoble ayaa wajahaya ololihii ugu weynaa ee lagu doonayo ee xilka looga qaado, kadib sanad ka yar oo uu xilka hayay.
Mooshin ka dhan ay Cali C/llaahi Cosoble ayaa lagu diyaarinayaa magaalada Jowhar, kaasoo saxiixiisa uu bilowday, waxaana xiisadan qarxiyay kadib markii uu 7 degmo oo cusub magacaabay.
Cali C/llaahi Cosoble ayaa dhowr jeer oo hore ka badbaaday mooshino bilow ah oo xildhibanada maamulkaasi ay wadeen, kadib markii uu faragelin ku sameeyay, laakiin xaaladda ayaa hadda ka duwan tahay markii uu isku furay xiisado aanu u baahneyn.
Shirar kala duwan oo lagu doonayo in kursiga looga tuuro madaxweynaha Hirshabeelle ayaa ka socda magaalooyinka Jowhar iyo Muqdisho, waxayna wararku sheegayaan in mooshinka socda uu yahay kii ugu weynaa ee lagu furo Cosoble.
Madaxweynaha Hirshabeelle ayaa hore loogu eedeynayay waxqabad la’aan iyo inuusan wax horumar ah ku soo kordhin maamulka uu hoggaanka u yahay, isagoo fadhigiisa ugu weyn uu yahay magaalada Muqdisho, isla markaasina uu halkaasi ka maamulo hantida Hirshabeelle ay ka hesho dowladda federaalka.
Shaqooyinkii ugu badnaa ee madaxweynaha Hirshabeelle uu qabtay mudadda sanadka ku dhow ee uu xilka hayay ayaa noqday magacaabid gole wasiiro, magacaabid guddoomiyeyaal gobol iyo degmo iyo magacaabid degmooyin cusub.
Wadani
