Madaxweynaha Maamulka K/Galbeed ee Soomaaliya C/casiis Xasan Maxamed (Lafta Gareen) ayaa soo saaray amar ah in magaalada Baydhaba ay isaga baxaan dhammaan ciidamada Milateriga dowladda Somalia ee xoogga dalka.
C/casiis Lafta-gareen ayaa sheegay in ciidamadan ay amni darro ka wadaan magaalada Baydhaba, ayna ka danbeeyeen dilkii shalay ka dhacay magaalada oo lagu dilay shan qof oo uu ka mid ahaa Ganacsade iyo siyaasi hore Cali Aadan Marguus. Amarka madaxweynaha K/Galbeed ayaa lagu sheegay in ciidamada ku sugan magaalada Baydhaba looga baahan yahay iny tagaan saldhigyadooda Duleedka magaalada Baydhaba iyo furimaha dagaalka.
Wuxuu ka dalbaday saraakiisha ciidamada Xoogga Dalka inay soo qabtaan oo cadaaladda la hor keeno askartii geysatay dilka ka dhacay magaalada Baydhaba, waxaayna arrintaasi salka ku heysay muran dhul iyo aano qabiil .
Ciidanka Booliska maamulka K/Galbeed ayaa la wareegay amniga magaalada Baydhaba, iyadoo heegan la geliyey, waxaana magaalada hareeyay xiisad beeleed oo ka dhalatay dilalkii shalay ka dhacay magaalada.
