Madaxweynayaasha dalalka Soomaaliya iyo Kenya Maxamed Cabdullaahi Farmaajo iyo Uhuru Kenyatta ayaa ku wadahadlay khadka telefoonka, kadib xiisad soo kala dhex gashay labada dal oo isku eedeeyay inuu mid waliba faragelin ku sameeyay qaranimada iyo madax bannaanida labada dal.
War-saxaafadeed kasoo baxay Madaxtooyada Soomaaliya ayaa lagu sheegay in labada madaxweyne isla garteen ahmiyadda ay leedahay in si wadajir ah labada dal ay uga shaqeeyaan sugidda nabadgalyada xuduudaha iyo guud ahaan xasilloonida gobolka.
Madaxweyne Farmaajo iyo Madaxweyne Kenyatta ayaa la sheegay inay isla qaateen in amniga labada dal uu yahay mid isku xiran, loona baahan yahay in laga fogaado wax walba oo keeni kara isfaham darro.
Labada Madaxweyne ayaa sidoo kale isku afgartay in sida ugu dhakhsiyaha badan ay u wada fariistaan guddiyo ka socda Soomaaliya iyo Kenya kuwaas oo ka shaqaynaya sidii loo xoojin lahaa xiriirka diblomaasiyadeed iyo kan ganacsi ee labada dad iyo dal ka dhexeeya.
Ma jiro wax War ah oo ka soo baxay dowladda Kenya, iyadoo wararku sheegayaan inuu Telefoonka diray Madaxweyne Farmaajo oo la xiriiray dhiggiisa dalka Kenya Uhuru Kenyatta.
