Madaxweynaha Puntland Siciid C/llaahi Deni oo ayaa dowlada Federaalka Soomaaliya ugu baaqay inay ciidamadeeda kala baxdo Gobolka Gedo.
Isagoo goor dhoweyd ka hadlayey shirka Somalia Partnership Forum ayuu caddeeyay in loo baahan yahay in la dhaqan geliyo heshiiskii Doorashada ee dowladda Federaalka Soomaaliya iyo dowlad Goboleedyada ee kasoo bilowday shirarkii Dhuusamareeb 1,2,3 iyo heshiiskii Muqdisho.
Madaxweynaha Puntland wuxuu shirka la wadaagay qoddobo uu walaac weyn ka qabo, isagoo qodobadaasi kusoo koobay:
1- In qaar ka mida xubnaha Guddiyada Doorshada inaysan buuxin shuruudihii heshiiska Doorashada, ayna walaac ka muujiyeen saamileyda siyaasadda dalka.
2- Inaan la fulin heshiiskii Madaxda dowladda Somalia iyo dowlad goboleedyada ee ku saabsanaa in Guddiyada doorashada Somaliland lagu soo xulo wada-tashiga dhammaan siyaasiyiinta kasoo jeeda Somaliland oo uu ka mid yahay Gudoomiyaha Aqalka Sare Cabdi Xaashi C/llaahi.
3- In Gobolka Gedo ka mid yahay Jubbaland, waxayna sharci buuxda u leedahay inay maamusho doorashada ka dhaceyso Garbahaarey iyadoo aanay saameyn kula yeelan awood ciidan, taasoo caqabad ku ah Doorasho xor ah oo ka dhacda.
Siciid Deni ayaa soo jeediyey:
Si loo qabto Doorasho waqtigeeda ku dhacdo oo xor iyo xalaal ah, loona fuliyo heshiiska Doorashada waxaan soo jeedinayaa:
1- Waa inay kulan degdeg isugu yimaadaan Madaxda Dowladda Federaalka iyo Madaxda Dowlad Goboleedyada si loo xaliyo arrimaha taagan.
2- In dib loogu noqdo Guddiga Doorashada la magcaabay ee Somalilad, lagana qeyb geliyo Guddoomiyaha Aqalka Sare Cabdi Xaashi, iyadoo dhinaca is -haya wadajir uga heshiinayaan arrinta guddiyada.
3- Iyo in dowladda Soomaaliya ay ciidamadeeda kala baxdo magaalda Garbahaarey, si Jubbaland u qabato doorasho xor iyo xalaal ah.
4- Guddiyada Doorashada waa in kaliya ay rasmi noqdaan, marka ay buuxiyaan shuruudaha loo dhigay oo ku cad heshiiska Doorashada.
