Madaxweynaha Mareykanka ee xilka kasii degaya Donald Trump ayaa amar ku bixiyay in ciidamada Mareykanka laga saaro Soomaaliya horaanta sanadka soo socda ee 2021.
Wasaaradda Difaaca Mareykanka ayaa shaacisay in Ciidamada Mareykanka ee Soomaaliya ku sugan intooda badan laga saari doono dalkaasi iyaga iyo saanadooda milateri, iyagoo ku laaban doona dalkooda, halka qaar kalena la geyn doono dalalka deriska (Jabuuti iyo Kenya).
Wasaaradda Difaaca Mareykanka ayaa sheegtay inay sii socon doonaan howlaha ciidamada Mareykanka sida ururinta xogta, dabagalka argagixisada iyo beegsidooda. Waxayna intaas ku dartay inaysan waxba iska bedelin siyaasadii Mareykanka ee la-dagaalanka argagixisada.
Go’aankan ayaa qeyb ka ah tallaabooyinka ugu danbeeya ee Madaxweyne Trump uu qaatay inta uusan talada ka degin, isagoo hore u amray in ciidamo badan oo Mareykan ah laga saoro dalalka Ciraq iyo Afghanistan.
Ciidamada Maraykanka ee jooga Soomaaliya ayaa u badan kuwo tababar siiya ciidamada dowladda Federaalka, isla markaana fuliya howlgallo lagu qaadayo Alshabaab, waxaana tiradooda oo aan si rasmi ah loo shaacin lagu sheegaa inay gaareyso 700 askari.
Arrintan waxay jug weyn ku tahay howlgalladii ay Mareykanka ku baacsanayeen Alshabaab ee ka socday Soomaaliya, iyadoo madaxweyne Farmaajo uu hore walaac uga muujiyey arrintan.
Waxa laga cabsi qabaa inay arrintan kordhiso weerarrada Alshabaab oo muddooyinkii dambe hoos u dhac ku yimid.
