Madaxweynaha Mareykanka Donald Trump ayaa markii ugu horeysay qiray arin uu in badan beenin jiray oo ku saabsan in wiilkiisa Trump Jr uu la kulmay saraakiil Ruush ah si uu “xog uga helo qof lid ku ah”.
Qoraal uu dhigay bartiisa twitter-ka ayuu ku sheegay in kulankaasi uu ahaa mid sharci ah., iyadoo hadalkan uu yahay qiraalkii ugu weynaa ee Tump laga hayo, waxaana si weyn loo hadal hayaa in Trump uu baxar geliyey wiilkiisa, ayna ugu wacan tahay sida darran ee uu u adeegsato baraha bulshada.
Guddoomiyaha Guddiga gaarka ah ee baaraya kiiskan Robert Mueller ayaa baaraya warbixin hay’adaha sirdoonka Maraykanka ay heleen oo ku saabsan faragalin Ruushka ay ku sameeyeen doorashadii Maraykanka 2016-kii, taas oo loogu xaglinayay Trump. Madaxweynaha ayaase beeniyay in ay jireen waxyaabo laga wada shaqeeyay.
Maalintii axadda ayay warbaahinta kala duwan ee CNN, Washington Post iyo wakaalada wararka ee AP waxa ay baahiyeen in Trump uu ka walwalsanyahay in wiilkiisa laga yaabo in uu galay dhibaato xagga sharciga ah, kadib kulankii uu la yeeshay dad Ruushka ka socda. Warbaahinta ayaa soo xiganayay illo wareedyo kala duwan.
“Warbaahinta been abuur ayay baahinayaan, waa wax aan sal iyo raad lahayn, in aan aniga ka walwalsanahay kulanka wiilkeyga qaaliga ah uu ku yeeshay dhismaha Trump Tower, kulanka wuxuu ahaa mid uu xog oga raadinayay qof mucaarad nagu ah, kulankana wuxuu ahaa mid sharciga waafaqsan”. ayuu yiri Trump
Trump ayaa intaas ku daray in uusan kaba warhaynin kulanka. Balse dhibka jira ayaa ah in hadalkan cusub uu burinayo hadaladii hore ee uu sheegay.
Markii wargeyska New York Times uu markii ugu horeysay baahiyey jiritaanka kulankan, Trump waxa uu sheegay in wiilkiisa iyo garyaqaanka Ruushka ah ay ka wadahadleen arrimo la xiriira barnaamij ay dowladda joojisay oo ku saabsanaa carruur Ruushka u dhashay oo ay korsan jireen dad American ah.
Haddase waxa uu sheegay in kulanka uu ku saabsanaa musharixii la tartamaysay Hillary Clinton, taasoo noqoneysa mid soo shaac bixisay wararka is burrinaya ee Trump iyo xiisada ka dhalatay baaritaanka ku socda.
Khubarada sharciga ayaa sheegay in Trump uu ku jiro gef sharciyeed, lagana yaabo inuu ku xad gudbay sharciga mamnuucaya in dowlad shisheeye laga qaato lacag ama wax uun faa’iido u leh ololaha doorashada.
Trump ayaase sheegay in xog wax yeeleyn kartay Clinton aysan uga soo bixin kulanka, waxayna ku adkaysanayaan in kulanka uusan jabinin wax sharci ah.
