Madaxweynaha Soomaaliya Maxamed C/llaahi Farmaajo oo todobaadkan xafiis iyo hoyba ka dhigtay xarunta Wasaaradda Gaashaandhigga ayaa wada dib u habeyntii ugu ballaarneyd ee lagu sameeyo hoggaannada Ciidanka Xoogga Dalka Soomaaliyeed.
Saraakiil ka tirsan Ciidamada Qalabka Sida ayaa xaqiijiyey isku shaandheyn iyo dib u habeyn lagu sameeyay tirada hoggaamada Ciidanka Milatariga ah oo horay u ahayd 22, qaarkoodna aya ahaayeen kuwo is dul saaran, waxaana hadda lagu soo koobay 13 hogaan.
Dib u habeynta madaxweyne Farmaajo ayaa meesha ka saartay 9 hoggaan oo la sheegay in ay dheeraad ku ahaayeen Taliska Ciidanka Xoogga Dalka, iyadoo la isku celceliyey shaqada hoggaanada saameynta isku lahayd, taasoo la filayo inay meesha ka saarto xaaladii ka dhex jiray Taliska Guud ee Ciidanka Xoogga.
Xogta ayaa sheegeysa in 10 ka mid ah hoggaanka cusub ee Ciidanka Xoogga laga soo xulay jiilkii dhexe ee Saraakiisha, halka dhammaan Taliye Ku Xigeennada laga dhigay dhallinyaro dhowaan ka soo qalin jabiyey kuliyadaha tababarka Ciidamada, waxaana rajo laga qabaa inay dhiig cusub geliso hoggaanka Ciidanka Xoogga Dalka.
Sidoo kale, howlihii isku dhafka ciidanka ayaa socda, iyadoo todobaadkan uu Madaxweyne Farmaajo tababar u soo xiray 600 oo Askari oo ka tirsan ciidamada Birmadka, kuwaasoo laga soo xulay dhammaan Dowlad Goboleedyada Dalka.
Ilo ku dhow Ciidanka Xoogga ayaa xaqiijiyey in qorshaha dib u habeynta loo daadajinayo dhammaan qeybaha kala duwan ee Ciidanka heer Urur ilaa heer Unug, ka hor inta uusan Madaxweyne Farmaajo u guurin degmada Afgooye oo la filayo in uu ka hoggaamin doono howlgallo ballaaran oo ka dhan ah Alshabaab.
Taliyeyaasha Ciidanka ayaa la faray in ay si deg deg ah ugu soo kala shaandheeyaan ciidanka diiwaan gashan ee ku jira shaqada iyo kuwa ka shaqeya howlaha aan la xiriirin ciidanka si liiska ciidannimao looga saaro.
Hannaanka bixinta mushaarka oo horey mad madoow badan uu ka jiray ayaa naloo xaqiijyey in xal u helistiisa meel wanaagsan ay mareeyso, iyadoona laga dhigay mid toos ah oo askariga mushaarkiisu ugu dhacayo koontadiisa xisaabeed, kaddib markii la soo gaba gabeeyo howlaha dib u habeynta diiwaan gelinta oo askari kasta loo diiwan gelin doono hab casri ah oo keydinaya xogtiisa sida calaamadaha suulka iyo indhaha.
Madaxweyne Farmaajo ayaa xoogga saaraya howlaha dib u habeynta Ciidanka Qalabka Sida, iyadoona uu garab weyn ka helayo Madaxda Dowlad Goboleedyada, dalalka IGAD iyo guud ahaan Beesha Caalamka.
