Madaxweynaha Federaalka Soomaaliya ayaan waxba ka bedelin qodob siyaasiyiin badan ay ku sheegeen inay sharaf dhac ku tahay madaxda Qaranka.
Arrintan ayaa ka dambeysay kadib markii uu garoonka diyaaradaha Muqdisho u tegay si uu ula kulmo safiirka Mareykanka u fadhiya Soomaaliya Stephan Schwartz, halkii ay ahayd in safiirka uu madaxweynaha ku booqdo xaruntiisa Villa Somalia.
Madaxweynaha Soomaaliya ayaa kasoo safray xarunta madaxtooyadiisa ee Villa Somalia, waxaana uu iska xaadiriyay qolka VIP-da ee Garoonka Adan Cadde ee magaalada Muqdisho, halkaasoo safiirka Mareykanka uu kula ballansanaa. (AKHRI WARKA KULANKA)
Musharixiin badan ayaa olole ku galay inay joojin doonaan in madaxda sare ee Qaranka loogu yeerto garoonka diyaaradaha, waxayna sheegeen inay arrintan ceeb ku tahay madaxda Soomaalida.
Diblomaasiyiinta reer Galbeedka ayaa Muqdisho ku arka goob aan ammaan ahayn, waxaana dalalkooda ay ka heystaan amar ah inaysan dhaafin xeyndaabka garoonka diyaaradaha, taasoo ahayd siyaasad soo taagneyd ilaa sanadkii 2009.
Sidoo kale madaxweyne Farmaajo ayaa intii uusan xilka la wareegin wakiilada beesha caalamka kula kulmay isla garoonka diyaaradaha magaalada Muqdisho.
Ma muuqato isbedel weyn oo madaxweyne Farmaajo la imaan doono sida dad badan oo taageeray filayeen. Madaxweyne Farmaajo ayaa khudbadii uu xilka kula wareegay ka sheegay in Soomaaliya oo 26 sano burbur ku jirtay aan bil iyo lix bilood waxba looga qaban karin ee ay u baahan tahay in 26 sano oo kale in dib loo dhiso.
Wadani.com
