Madaxweynaha waqtigiisu sii dhammaanayo ee Soomaaliya Maxamed Cabdullaahi Farmaajo ayaa ku adkeysatay qabashada Doorasho lagu muransan yahay, isagoo xukuumadda ku bogaadiyay dadaalka ay gelisay arrimaha doorashada
Qoraal kasoo baxay Madaxtooyada ayaa lagu sheegay in xuluumaddu fulineyso doorkii Dowladda Federaalka uga aaddanaa heshiiskii ay gaareen Madaxda Dowladda Federaalka Soomaaliya iyo Dowlad Goboleedyada dalka kaasi oo ay si wadajir ah u ansixiyeen Golaha Shacabka iyo Aqalka Sare ee Baarlamaanka Federaalka Soomaaliyeed 26-kii Sibteembar, 2020.
“Waxa naga go’an in si buuxda loo fuliyo heshiiskii doorashada iyada oo laga fogaanayo dib-u-dhac ku yimaadda xilliga doorashada. Sidaas darteed, waxa aan Dowlad Goboleedyada aan weli soo dhammaystirin xubnaha ay ku leeyihiin guddiyada hirgelinta doorashooyinka ugu baaqayaa inay ka shaqeeyaan sidii looga dhabayn lahaa qodobbadii iyo hab-raacyadii lagu heshiiyay, aniga oo rajaynaya inay sida ugu dakhsaha badan u soo magacaabi doonaan qaybta ku hartay.” Ayuu yiri Madaxweyne Farmaajo oo baaq u diray maamul Goboleedyada Puntland iyo Jubbaland.
Madaxweyne Farmaajo ayaa warkiisu kusoo beegmay xilli Guddiga lagu muransan yahay ee doorashada uu shalay doortay Guddoomiye iyo guddoomiye ku xigeen, isla markaana ay maamul Goboleedyada ay maamullada Puntland iyo Jubbaland weli magacaabin xubnahii Doorashada, isla markaana aysan soo dirin xubnaha uga mid noqon lahaa Guddiyada doorashada heer federaal.
