Madaxweynaha Dowladda Federaalka Soomaaliya Maxamed Cabdullaahi Farmaajo ayaa ku dhawaaqay shir uu magaalada Muqdisho ku casuumay madaxda maamul Goboleedyada dalka.
Qoraal kasoo baxay xalay saqdii dhexe Madaxtooyada ayuu madaxweyne Farmaajo u diray maamul Goboleedyada farriinta martiqaadka kulanka oo ka dhacaya Muqdisho 5-8 July 2020, iyadoo arrintan ay daba joogto kulankii khadka internetka ku dhex maray Madaxda dowladda Federaalka iyo Maamul Goboleedyada oo madaxweynaha laga dalbaday inuu soo sheego kulanka tooska ah xilliga uu dhacayo iyo goobta uu ka dhacayo.
Ajandaha shirka ayaa lagu sheegay inuu yahay sidii wadatashiyo ballaaran looga yeelan lahaa doorashooyinka dalka, arrimaha amniga, dagaalka ka dhanka ah kooxaha argixisada, dhammeystirka dib u eegista dastuurka iyo horumarinta dhaqaalaha dalka.
Madaxweyne Farmaajo ayaan wax tallaabo ah u qaadin dalabkii madaxda dowlad Goboleedyada ee ahaa inuu joojiyo dooda xeerarka dhammeystirka Doorashada ee ka socota Baarlamaanka Federaalka.
