Madaxweynaha Soomaaliya Mudane Maxamed Cabdullahi Farmaajo oo ayaa sii xoojiyey ololaha Sharciga Doorashada ee uu doonayo in taageerayaal ku yeesho xildhibaannada labada Aqal ee Baarlamaanka, wuxuuna maanta kulan la qaatay Xildhibaannada haweenka ah ee Labada Aqal ee Baarlamaanka.
Sida ay faafisay Madaxtooyada Soomaaliya Madaxweynaha ayaa xildhibaanada haweenka kala hadlay hadlay dhammeystirka xeerarka iyo sharciyada ku saleysan horumarinta haweenka iyo dhallaanka ee horyaalla Golaha Shacabka iyo Aqalka Sare. Wararka ayaa sheegaya kulanka ujeedka ugu weyn uu ahaa in xildhibaannada haweenka uu Madaxweynaha u dhaadhiciyo qaabka Doorasho ee uu doonayo.
“Waxaan diyaar u nahay in aan ku dhiirri-gelino haweenka Soomaaliyeed door kasta oo ay leeyihiin. Waxaana idiinka mahadcelinayaa shaqada adag ee aad Qaranka u haysaan oo ay ugu horreyso geedi socodka siyaasadeed iyo dib u eegista dastuurka…” ayuu yiri Madaxweyne Farmaajo.
Xildhibaannada haweeka ayaa la wadaagay Madaxweynaha warbixin ku saabsan Shirweynihii 3-aad ee Xildhibaannada Haweenka ah ee Baarlamaanka oo ay ka soo qeyb galeen qeybaha kala duwan ee bulshada rayidka ah, iyagoona ka xog wareystay qorsheyaasha dowladda ee awoodsiinta Haweenka.
Madaxweyne Farmaajo ayaa hore kulamo xiriir ah ula yeeshay xildhibaannada Baarlamaanka, isagoo ku adkeystay inay dalka ka dhici doonto Doorasho Qof iyo Cod ah oo aan di loogu noqon doonin nidaamkii Odayaasha iyo ergada.
