Madaxweynaha Soomaaliya Maxamed Cabdullaahi Farmaajo ayaa xilka ka qaaday xeer-ilaaliyihii guud ee Qaranka Axmed Cali Daahir, isaga oo magacaabay xeer ilaaliye cusub.
War-saxaafadeed kasoo baxay madaxtooyada Soomaaliya ayaa lagu sheegay in Suleymaan Maxamed Maxamuud loo magacaabay xeer ilaaliyaha cusub ee dalka, iyadoo magacaabistani ay ku timid soo jeedinta guddoomiyaha Maxkamadda Sare ee Dalka Baashe Yuusuf Axmed, baahida loo qabo in la dardargeliyo hawlaha dib u habeynta garsoorka iyo xaqiijinta hannaan cadaaladeed oo hufan oo ka dhaqangala guud ahaan dalka.
Qoraalka ayaa sidoo kale waxa uu madaxweynaha uga mahadceliyay Xeer Ilaaliyihii hore ee Axmed Cali Daahir “Shaqadii uu u soo qabtay dalka iyo dadaalkii uu muujiyey muddadii uu ahaa Xeer Ilaaliyaha Guud ee Qaranka.”
Dhinaca kale, Madaxweyne Farmaajo ayaa faray xukuumadda, una jeediyay Hay’adaha Sharci-dejinta in ay soo dhameystiraan Golaha Adeegga Garsoorka, lana waafajiyo Dastuurka Kumeel Gaarka ah iyo Xeerarka khuseeya dhismaha Golahan, si loo dhammeystiro dib u habeynta garsoorka iyo hannaanka cadaaladeed ee dalka, sida lagu sheegay qoraalka Villa Somalia.
Axmed Cali Daahir ayaa xubin ka ahaa mas’uuliyiinta dowladda Soomaaliya ee hoggaaminayey qareenada Soomaaliya u doodaya ee kiiska badda ee horyaalla maxkamadda ICJ. Wuxuuna ilaa dowladii hore ee Xasan Sheekh uu ahaa Xeer ilaaliye.
Madaxda Soomaalida ayaa lagu yaqaan in sanadka ugu danbeeya xilkooda ay sameeyaan xil ka qaadis iyo magacaabis fara badan.
