Madaxweynaha Mareykanka ayaa dib u sixitaan ku sameeyay hadal kasoo yeeray xilli uu shir jaraa’id la qabtay madaxweynaha Ruushka isagoo rumeystay madaxweyne Putin, isagoo shaki ka muujiyey sirdoonkiisa, taasoo si weyn looga cambaareeyay gudaha Mareykanka.
Madaxweyne Trump ayaa sheegay in uu aqbalayo xaqiiqada baaritaanka laamaha sirdoonka Maraykanku ku sheegeen in Ruushku faragelin ku sameeyay doorashadii Maraykanka ee 2016-kii, taasoo ah mid burinaysa hadalladii uu ka yidhi shirmadaxeedkii uu la yeeshay Vladimir Putin Isniintii.
Shir jaraa’id oo uu qabtay kadib markii uu dalkiisa ku laabtay goor dhoweyd ayuu sheegay inuu dib ugu laabtay hadalkii uu ka jeediyey magaalada Helsink, ayna jirtay hadal si khaldan uga soo baxay, wuxuuna sheegay inuu doonayey in uu ku caddeeyo in hadalkaa uu hore u yiri uu ula jeeday in aanay jirin sabab lagu maleysan karo in Ruushku farogelin karayey doorashada.
Trump waxa uu dhaleecayn culus kala kulmay Aqalka Congress-ka oo ku dhaliilay hadalkiisii ahaa in aanay u muuqan sabab caddayn karta in Moscow doorashooyinkaa farogelin karaysay.
Waxaanu ballan ku qaaday in uu ilaalin doono doorashooyinka dame ee dalka ka dhici doona, hase yeeshee waxa uu ku nuuxnuuxsaday in xidhiidh diblomaasiyadeed iyo iskaashi dhex mara dalkiisa iyo Ruushku ka fiican yahay khilaaf iyo colaad ka dhex abuuranta.
