Madaxweynaha Mareykanka Donald Trump ayaa shaaciyey in laga baaray cudurka Coronavirus, isla markaana uu sugayo natiijada baaritaanka oo xalay laga qaaday.
Trump ayaa hore u diiday in la baaro kadib markii cudurka laga helay mas’uuliyiin fara badan oo uu la kulmay oo uu ugu danbeeyay xoghayaha xiriirka Madaxweynaha Brazil, laakiin ugu danbeyn waxaa lagu qanciyey in la baaro, sida uu goor dhoweyd ku dhawaaqay. Natiijada ayaa qaadan doonta maalin ilaa laba maalin.
Wararkii ugu danbeeyay ayaa sheegaya in Donald Trump laga waayey cudurka Coronavirus, sida lagu ogaaday natiijada baaritaankii laga qaaday, waxaana sidaas shaaciyey dhaqtarka Aqal Cad Sean Conley.
Madaxweynaha Mareykanka ayaa hore loogu cambaareeyay inuu yareeyay haliska cudurka, taasoo markii danbe ku qasabtay in xaalad degdeg xalay ku dhawaaqo, wuxuuna mar kale sheegay in xayiraadda duulimaadka la gaarsiinayo UK iyo Ireland oo hore looga reebay.
Wuxuu ku adkeystay in Mareykanka uu ka adkaan doono cudurka Coronavirus, ayna leeyihiin awood balaaran iyo hanti badan oo ay kula tacaali karaan cudurka.
Dhinaca kale Madaxa Machadka Cudurrada faafa ee Mareykanka Dr. Anthony Fauci ayaa goor dhoweyd shaaciyey in 24-kii saac ee la soo dhaafay dalka Mareykanka laga diiwaan geliyey 2226 qof, waxaana u dhintay 50 qof.
