Wararka laga helayo magaalada Hobyo ayaa sheegaya inuu goor dhoweyd halkaasi gaaray madaxweynaha waqtigiisu dhammaaday ee maamulka Galmudug Axmed Ducaale Xaaf.
Safarka Xaaf ee degmada Hobyo ayaa ahaa mid lama filaan ah oo aan hore loo qorsheyn, wuxuuna ku sugnaa magaalada Muqdisho tan iyo intii uu heshiiska la galay dowladda Somalia, kadibna mas’uuliyadii ku wareejiyey xukuumadda Soomaaliya, waxayna arrintan kusoo beegmeysaa iyadoo lagu dhawaaqay in lasoo gabagabeynayo shirka beelaha H/Gidir ee ka socday Hobyo iyo khilaafka ka dhex taagan dowladda Federaalka iyo Ahlu suna ee magaalada Dhuusamareeb.
Madaxweyne Xaaf ayaa maalmihii ugu danbeeyay soo saaray wareegtooyin uu xilalka uga qaaday xubno ka tirsan Golaha Wasiirada Galmudug oo ka hor yimid Qorshaha dowladda Federaalka Soomaaliya, iyadoo aan caddeyn ujeedkiisa inuu ku biiro shirka ka socday degmada Hobyo.
