Madaxweynaha dowlaadda Federaalka Soomaaliya Xasan Sheekh Maxamuud iyo wafdi uu hoggaaminayey ayaa gaaray magaalada Ankaar ee dalka Turkiga, safarkii labaad ee uu dibadda ugu baxo intii xilka loo doortay.
Waxaa Garoonka diyaaradaha kusoo dhoweeyay Wasiirka Waxbarashada dalka Turkiga Mahmut Özer, Safiirka Soomaaliya u fadhiya dalka Turkiga Jaamac Cabdullahi Caydiid iyo qaar ka mida mas’uuliyiinta Turkiga.
Wafdiga Madaxweyne Xasan Sheekh la socda waxa ka mida Sii-haya wasiirka Gaashaandhigga C/qaadir Maxamed Nuur, Sii-haya wasiirka Arrimaha dibadda Maxamed Balal Cusman oo uga hormaray Turkiga, Agaasimaha Madaxtooyada Xuseen Sheekh, Xildhibaan C/risaaq Cumar Maxamed iyo xubno kale.
Madaxtooyada Soomaaliya ayaa sheegtay in Madaxweynaha uu casuumaad ka helay dhiggiisa dalka Turkiga Recep Dayyip Erdogan, ayna ka wadahadli doonana xoojinta xiirirka labada dal ee dhinaca Aminiga, dhaqaalaha iyo Ganacsiga.
Xasan Sheekh ayaa booqan doona saldhigga lagu tababarro ciidamada Soomaaliya ee magaalada Sparta iyo goobo kale, wuxuuna ka qeyb geli doonaan Dood uu qabanayo Machad-ka Seta ee magaalada Ankara.
