Madaxweynihii hore ee Hirshabelle Cali C/llaahi Cosoble ayaa ku taliyey in Doorasho barbar socota tan magaalada Jowhar ee Xarunta Hirshabeelle laga abaabulo magaalada Beledweyne, laguna doorto Madaxweyne iyo Madaxweyne ku xigeen iyo maamul kale.
“Waxaan ku talinayaa howsha Jowhar ka socota mid la mid ah in Baladweyne laga bilaabo. Baarlamaanka Hirshabeelle ha la xulo, madaxweyne iyo ku xigeenna ha la doorto Baladweyne ha ku shaqeeyaan. Xaq baad u leedihiin, cid idinka hor istaagi karta ma jirto. Intaa markaad sameysaan ayey DFS, IGAD, AU iyo bulshda caalamka idin dhageysan doonaan…” ayuu qoraalkiisa ku yiri Cali C/llaahi Cosoble.
Isagoo sii hadlay ayaa dhex galay arrimaha beeleed iyo khilaafka taagan isagoo yiri: “Abgaal reer Baladweyne ah waa idinla joogaan ee ka dhigta madaxweyne ku xigeen, beelaha kale dhamaantoodna waa reer Hiiraan. Xawaadlow ogaada waa la idin riix riixayaa si la idiin tijaabiyo. Ha ku dhicina imtixaanka. Qaniinyo qaniinyaa kaa fujisa. Fowdana waa laga hortagaa ee lama sugo..”
Dad ka badan 1000 qof ayaa jawaabo ka bixiyey qoraalka Cali C/llaahi Cosoble, iyagoo ku dhaliilay intooda badan inaysan ku habooneyn hadallada kasoo yeeray, waxayna qaarkood ku eedeeyeen inuu ka baxay xadkii siyaasadda iyo maqaamkii siyaasadeed ee uu lahaa.
Dadka Warkan sida weyn u naqdiyey waxaa ka mida Xildhibaan Mahad Maxamed Salaad oo sheegay inuusan hadalkan ahayn mid looga fadhiyey madaxweynihii hore ee Hirshabeelle.
