Xildhibaan Mahad Maxamed Salaad jawaab kulul ka bixiyey khudbad uu maanta jeediyey madaxweyne Maxamed C/llaahi Farmaajo oo sheegay in dalku ka degi la’ yahay faragelin shisheeye iyo siyaasiyiin raba inay dumiyaan dowladda.
Wuxuu is weydiiyey Qaranka Madaxweyne Farmaajo ka sheekeynayo tolow midka uu yahay Maraykankaa mise waa midka Soomaaliya?!, wuxuuna yiri: “Madaxweyne Farmaajo markii la doortay bishii Febaraayo 2017 wuxuu diiday in uu ka tanaasulo dhalashada Maraykanka ee uu haysto. Wuxuuna doortay in uu noqdo muwaadin Maraykan ah oo ka shaqeeya masaalixda Maraykanka, intii uu noqon lahaa Madaxweyne xalaal ah oo mudnaanta koobaad siiya dalkiisa iyo dadkiisa..”
Xildhibaan Mahad Slaad oo si weyn ugu kacsan hoggaanka Farmaajo ayaa ku eedeeyay inuu been iyo boor isku qaris ku indho sarcaadinayo dadka Soomaaliyeed, si uu uga dhuunto eedeynta la xariirta lacago la lunsaday oo beesha caalamka ugu talo gashay in lagu maalgeliyo adeegyada aasaasiga iyo mashaariicda horumarineed ee dowlad goboleedyada.
Wuxuu didaacay shirka ay magaalada Nairobi ku yeesheen madaxda dowlad Goboleedyada iyo beesha caalamka, kaasoo uu sheegay in looga arinsanayo sidii beesha caalamka iyo madaxda dowlad gobleedyada isaga waraysan lahaayeen meesha lacag uu sheegay inay lunsadeen madaxweynaha iyo saaxiibadii oo loogu talogalay maamul Goboleedyada.
“Wa nasiib daro aad u weyn in maanta Madaxweynaheena la soo istaago wadamo shisheeye ayaa lala shirayaa iyo wadaninimo been ah oo faruuryaha Madaxweyne Farmaajo aan soo dhaafin labadii sano ee uu Madaxweynaha ahaa!” ayuu yiri.
