Xildhibaan Mahad Maxamed Salaad oo ka tirsan Baarlamanka Federalka ayaa su’aalo culus ka keenay qaabka dowladda Federalka u wado ka hortagga Coronavirus, wuxuuna soo qaaday laba dhacdo oo muujineysa inuusan socon dadaal looga hortageyo cudurkan.
Xildhibaanka ayaa ka hadlay diyaaradii uu shalay ku yimid magaalada Mogadishu oo uu sheegay inay la saarnaayeen dad ka yimid dalalka Yurub qaar ka mid ah, oo cudurka Coronavirus fara ba’an ku hayo, wuxuuna yiri: “Intooda badan magaalada ayay galeen marka laga reebo shan dhalinyaro ah oo Talyaaniga ka yimid, Baasabooro Soomaali ahna watay, qol afar mitir ah oo geggida diyaaradaha Adan Cadde ku dhex yaala musqulna aan lahayn ayaa lagu xareeyay xalayna ku hoydeen ilaa hadana kujiraan, hal qof oo wasaarada caafimaadka ka socda uma tagin”
Xildhibaan Mahad Salaad ayaa sheegay inuu arrintan kala hadlay Madaxda dowladda qaarkood oo arintaan, balse aysan ilaa hadda cidna u dirin, wuxuuna is-weydiiyey dayaca intaas la’eg ee meesha ka jira iyo weiba faanka beenta ah ee uu sheegay in maalmahaan warbaahinta lagu arkayey!
“Sidoo kale saakay waxaa yimid Isbitaalka Ordogan ee horay loo oran jiray Isbitaal Digfeer nin xanuunsan, laguna arkay dhamaan caalamadihii muujinayay caabuqa Coronavirus, sida uu sheegayna meel kula noolaa nin ka yimid dalka Ingiriiska markii uu dib u laabtayna laga helay cudurka. Ninkii waxa lagu wareejiyay Wasaarada Caafimaadka, dhaqaatiirtii baartayna 14 beri ayaa Isbitaalka laga fasaxay. Su’aashu waxay tahay hadii qofkan xanuunsan la ogaado in uu cudurka qabo, dhaqaatiirtii baartayna ay suurogal tahay in ay cudurkii ka qaadeen bukaankaas magaaladana lagu sii dhex daayay, soo cudurkii sii faafi maayo?!..” ayuu yiri Xildhibaan Mahad Salaad oo ku taliyey in loo wada istaago sidii dadka looga badbaadin lahaa cudurkaan dilaaga ah, xukuumadana ay la timaaso waxqabad la taaban karo.
