Waxaa sii kordhaya siyaasiyiinta iyo waxgaradka cambaareynaya falkii xalay lagu laayey dadkii shacabka ahaa ee laga ururiyey magaalada Gaalkacyo qeybta ay maamusho Galmudud, kadib markii sarkaal ka tirsan nabadsugidda Galmudug lagu dilay magaalada.
9 qof oo si heyb ahaan looga soo ururiyey Koonfurta magaalada Gaalkacyo ayaa goob qura laguia toogtay, iyadoo dilkaasi si weyn looga argagaxay ayaa dadka ka hadlay waxaa ka mida madaxweynihii hore ee Galmudug iyo xildhibaan Mahad Maxamed Salad oo ka mid Baarlamaanka federaalka.
“Waxaa sidoo kale canbaareynayaa falka foosha xun ee lagu xasuuqay dad shacab ah oo aan waxaba galabsan ee hayb ahaan lala xariiriyay dilka sarkaalka (la dilay). Waxaan si gaar ah tacsi ugu dirayaa eheladii iyo asxaabtii ay ka geeriyoodeen. Naxariistii Jano Alle haka waraabiyo. Samir iyo iimaan Alle haka siiyo. Aamiin…” ayuu yiri Mahad Salaad oo dalbaday in Madaxda Galmudug ay arintaas tilaabo deg deg ah ka qaadaan. Sharciga la horkeeno dadkii xasuuqaas geystay iyo kuwiii dilay sarkaalkaba.
Madaxweynihii hore ee Galmudug C/kariin Xuseen Guuleed ayaa isna qoraal uu arrintan kasoo soo saaray ku yiri:“Waxaan Cambaareynayaa dilalka foosha xun ee labada waji leh ee loo gaystay dad gaaraya illaa 9 ruux ee ka dhacay Magaalada Gaalkacyo, kuwaasi oo loo gaystay dad aan waxba galabsan, waxaan Waxgaradka & masuuliyiinta reer Gaalkacyo & Galmudugba u soo jeedinayaa inay dadkii dilkaasi gaystay soo qabtaan cadaaladda horkeenaan.” Ayuu yiri Cabdi Kariin Xuseen Guuleed oo Qoraal soo dhigay Boggiisa xiriirka Bulshada.
