Wararka laga helayo Gobolka Hiiraan ayaa sheegaya in maleeshiyo taabacsan hoggaamiyaha Ahlu suna ay hor istaageen ciidamo ka socda AMISOM oo ku sii jeeday Gobolka Galgaduud, gaar ahaan magaalada Dhuusamareeb.
Kolonyo ka tirsan Ciidamada AMISOM ee kasoo jeeda dalka Jabuuti ayaa ka baxay magaalada Beledweyne, waxaana la sheegay inay degmada Matabaan ku hor istaageen maleeshiyada Ahlu suna ee ka amar qaadata hoggaamiyaha kooxda Macalin Maxamuud, iyadoo ciidamadaasi u diiday inay u gudbaan dhinaca Gobolka Galgaduud, waxaana halkaasi ku hakaday socdaalkii ciidamadaasi.
Hoggaamiyaha Ahlu suna ayaa hore u diiday in ciidamo ka tirsan AMISOM ama dowladda Federaalka la geeyo magaalada Dhuusamareeb, tallaabadaas oo ay dowladda Somalia iska dhega tirtay, iyadoo maalmihii ugu danbeeyay ciidamo iyo hub ku daabushay magaalada Dhuusamareeb.
Maleeshiyo ku sugan Matabaan iyo Guriceel ayaa weli taabacsan hoggaamiyaha Ahlu suna, halka ciidmadii ku sugnaa magaalada Dhuusamareeb intooda badan ay qarameysay dowladda Somalia, kana biyo diideen amarradii uu siiyay Macalinka.
Ciidamada la hor istaagay ee AMISOM oo ka socda dalka Jabuuti ayaa laga yaabaa inay ku biiraan ciidamo kale oo Itoobiyaan ah, kuwaasoo dowladda Somalia ay dooneyso inay sugaan amniga magaalada Dhuusamareeb oo shir dib u heshiisiin ah iyo Doorashada Galmudug ka dhici doonto.
