Waxaa fadhiyada siyaasiyiinta iyo xildhibaanada dalka hareeyay dood loogu qiil dayayo go’aanka uu madaxweyne Xasan Sheekh qaatay Axadii 22 May 2016 ee uu kula wareegay awoodii Baarlamaanka ee ansixinta Qaabka Doorashada 2016, taasoo lagu sheegayo in talada ay faraha ka bixi lahayd…!!
Dooda ugu weyn ee taageerayaasha xeerka Madaxweyne (ee shalay ahaa mucaaradka Madaxweynaha) waxay salka ku heysaa in dalku geli lahaa khatar, mustaqbalkiisuna mugdi ku socday, wuxuuna fekerkan ku daaban yahay war ka mid ahaa khudbad uu Madaxweyne Xasan Sheekh ka jeediyay Baarlamaanka isla 19-kii Bishan oo uu ku sheegay in haddii ay tashan waayeen loo talin doono.
Xog ay heshay Wadani.com ayaa sheegeysa in madaxda Madasha Qaran ay cadaadis weyn kala kulmeen Beesha Caalamka kadib markii Baarlamaanku ansixin waayay heshiiska maalintii ay safiirada Q/Midoobay Muqdisho ku sugnaayeen oo loo qorsheeyay in lagu maamuuso.
Dooda siyaasiyiinta Madasha Qaran ayaa ahayd in haddii Baarlamaanka loo daayo arrintan oo ay isku khilaafaan ama diidaan heshiiska doorashada in Golaha Ammaanka kulan ka yeelan lahaa arrinta Soomaaliya isla markaana loo aqoonsan lahaa dal fashilmay, lana hoos geyn lahaa Q/Midoobay.
Waaqicninada arrintan haddii la rogrogo waa mid laga badbadiyay oo aan la socon karin waaqica diblomaasiyadeed iyo xaalada dunida ka jirta, waxaase arrintan oo dhan ay caddeyn u tahay sharci darrada ka jirta Soomaaliya iyo dowladnimada ka jirta dalka ay u tahay mid ku dhisan rabitaanka koox la baxday Beesha caalamka oo aan isku aragti ka ahayn Soomaaliya, isla markaana u daneyneynin Qaranka buka ee Boqolka u talisay.
Wadani.com
