Madaxweynaha Galmudug Axmed Cabdi Kaariye (QoorQoor) ayaa ku baaqay in si degdega loo doorto guddoonka labada Aqal ee Baarlamaanka iyo Madaxweynaha Soomaaliya.
Qoorqoor oo ka hadlayey Xaflad ka dhacday Gaalkacyo ayaa sheegay in xildhibaanadii ugu badnaa ay dooran yihiin, loona baahan yahay inaan waqti kale la lumin oo dalka laga saaro hubanti la’aanka ka dhalatay daahista doorashada, si degdeg ahna loo doorto guddoonka Baarlamaanka iyo Madaxweynaha dalka.
Wuxuu ku dooday Madaxweyne Qoorqoor in dhameystirka doorashada dalka ay ku xiran yihiin arrimo badan sida: La-dagaalanka Al Shabaab, Dowladnimada iyo horumarka dalka, isla markaana loo baahan yahay in degdeg doorashada loo soo xiro.
“Xildhibaanada dooran waa ku filan yihiin in Doorashooyinka inta dhiman ay guda galaan, waa in degdeg, haddana la doortaa guddoonka labada aqal, kadibna la doortaa Madaxweyne” ayuu yiri Axmed Qoorqoor.
Hadalka Madaxweynaha Galmudug ayaa yimid saacado kadib markii uu ka hor yimid jadwalka Guddiga Doorashooyinka Heer Federaal ee FEIT oo 14-ka Bisha April u asteeyay in la dhaariyo xildhibaannada Baarlamaanka.
Kooxda Madaxweynaha xilkiisu dhammaaday ee Farmaajo ayaa dadaal ugu jirta in Garbahaarey lagu qabto doorashada 16-ka kursi ee khilaafku ka taagan yahay, Balse Qoorqoor ayaa u muuqda mid iska bedelay fekerkiisii.
