Weerarkii labaad ayay Alshabaab ku qaaday muddo 5 maalmood gudahood ah degaanka Mesagowaay ee Gobolka Galgaduud aroortii Talaadada 30-ka bisha May 2023, kadib weerarkii 26-ka bishan ee ka dhacay Buulomareer Sh/hoose.
Labada weerar waxay isaga mid ahaayeen xilliga ay dhaceen xilli aroor ah, waxayna dhaliyeen qasaare baaxad leh oo dhimasho iyo Saanad milateri leh, iyadoo labada dhinac ay ku dadaaleen inay warbaahinta u adeegsadaan dagaalka oo guulo ay ka sheegteen.
Weerarkii Mesagowaay oo ahaa kii labaad oo Alshabaab halkaasi ku qaado ayey ku adeegsaday qaraxyo, waxayna dadka degaanka xaqiijiyeen in Alshabaab ay gudaha u galeen magaalada, ayna qabsadeen saldigii ciidamada oo ay ku sugnaayeen ciidamada laga keenay Eritrea iyo Milateriga Soomaaliya iyo Macawisley.
Alshabaab waxay qabsadeen 3 gaadiidka dagaalka ah, iyadoo dagaalka lagu dilay askar ka mida ciidamada dowladda iyo dadka degaanka, balse markaas kadib ayaa waxaa gurmad ahaan goobta u yimid ciidamadii ku sugnaa Ceeldheer, iyadoo dagaal culus uu dhex maray labada dhinac.
Ciidamada gurmadka ayaa qasaare lixaad leh gaarsiiyay Alshabaabkii ku sugnaa Mesagowaay, waxaana dib looga celiyay qaar ka mida gaadiidkii ay qabsadeen, iyadoo maleeshiyo badan looga laayay halkaasi, taasoo xaaladda wax ka bedeshay.
Taliska ciidamada iyo Warbaahinta dowladda waxay sheegeen in laga hortegay weerarkii Alshabaab ee Mesagowaay, lagana dilay ilaa 30 maleeshiyo oo meydadkooda ay daadsan yihiin magaalada, waxayna soo bandhigeen muuqaal kooban oo muujinaya ciidamo ka dagaalamaya magaalada.
Dhinaca kale Alshabaab waxay sheegtay inay dagaalkii Mesagowaay ku dishay 73 askari, kuna dhaawacday 80, kale, halka askar ay isu dhiibeen, waxay kaloo soo bandhigtay Gaadiidkii iyo Hubkii ay ku qabsatay dagaalkii Mesagowaay oo intooda badan aan la xaqiijin karin marka laga reebo laba gaari oo mid xamuul yahay, hal askari oo la qabtay oo warbaahint Alshabaab wareysatay iyo sidoo kale meydadka qaar ka mida askarta.
Dagaalka tooska ah ee dhex maraya ciidamada dowladda, ATMIS iyo Alshabaab waxaa barbar socda dagaal warbaahineed oo keenay in qarsoonto xaqiiqada weerarrada dhacaya iyo qasaaraha labada dhinac oo qolo kasta ay qarineyso, iyadoo sheeganeysa guul, laakiin baraha bulshada waxaa lagu baahiyaa geerida ciidamada dowladda iyo dadka degaanka, halka qasaaraha Alshabaab aan la ogaan karin.
