Ra’iisal wasaaraha xukuumadda Soomaaliya ayaa galabta tegay Bandhigga 4-aad Carwada Buugaagta Muqdisho, waxaana dad fara badan oo goobtaasi ku sugnaa loola dhaqmay si aan loo arag oo bahdilaad ah, markii dibadda looga saaray hoolka, kuwii ku socdayna laga xiray wadooyinka.
Dad badan ayaa baraha bulshada uga haday wixii ka dhacay galabta hoolka Sahal ee KM4, iyadoo si weyn u naqdiyey qaabka Ra’iisal wasaare Kheyre iyo ilaaladiisa ula dhaqmeen dadkii goobta ku sugnaa iyo kuwii ku sii socday, iyadoo qaarkood ay ka dalbadeen inuu raali gelin ka bixiyo.
Waxaan soo qaadaneynaa qormo kooban oo uu dhacdadii maanta ka qabsaday ka qoray ustaad C/casiis Gurbiye, tasoo ku bilaabtay:
Ra’isul Wasaare Kheyre…Ma Yahay Waxa Laga Dhigayo?! Mise Waa Naga Hartey Waa “common man,”!!
Mogadishu Book Fair sanadkan waa ka amni badnaa sanadihii hore. Sahal oo ah goobta lagu qabanayey waxaa qofka intaanu gelin Hoolka la dhex marinaa mashiinka qeyliya! labadii Maalin ugu horeysay oo aan tagay xataa suunka iyo saacadaha waan bixinnay!
Inta aanu maanta Kheyre tagin waxaa uga horeeyey dad muhiim ah sida Ra’isul wasaare ku-xigeenkiisa Mahadi, duqa magaalada Yarisow iyo gudoonka aqalka sare. Ajaanib, Xildhibaannada labada aqal, wasiirro iyo shakhsiyaad maamuus badan ayaa tegay maalmahan. Runtii dadkooda ayey ka mid ahaayeen, oo baaritaanna ma jirin, cid ku mashquushana ma leh, oo howshii ay u tageen waa soo guteen, waana soo baxeen buuq la’aan!
Laakin galabta imaatinka Kheyre ma aheyn mid Kheyr badan, mid ceebeed ayuu ahaa! Horta markii hore Kheyre liiska rasmiga maba ku jirin oo madaxweynaha ayaa xiritaanka lahaa, laakin safar ayuu jiraa. Haddii badal laguugu keenay cayaarta ma inaad haleysaa, oo dadka in dibadda loo saaro, la baaro oo la bahdilaa..?! Waa yaabe maxay tahay waxa uu heysto oo aaney heysay madaxdii maalmahan tageysay..?! Waa su’aale maku saxnaa inuu bahda qalinleyda, aqooyahanada iyo bahda waxbarashda sidan loo bah dilo?!! Aawey fikraddii la iibin jiray ee aheyd waa nin caadi ah oo dadkiisa ka mid ah?
