Magaalada Cadaado ayaa isu bedeshay magaalo shidan oo loolan siyaasadeed ka socdo, kadib markii uu xalay xaalay madaxweynaha maamulka khilaafku ragaadiyey ee Galmudug Axmed Ducaale Geelle Xaaf.
Waxaa shalay magaalada Caddaado gaaray xildhibaanno ka tirsan labada Gole oo degaankaasi kasoo jeeda, kuwaasoo xalay soo galbiyey madaxweyne Xaaf, kuna soo dhoweeyay madaxtooyada magaalada Cadaado oo sanadkii hore uu isaga tegay, waxaana u bilowday shirar ku saabsan xaaladda Galmudug.
Xildhibaannada uu hoggaaminayey guddoomiye ku xigeenka Aqalka Sare Abshir, Bukhaari oo ay ka mid yihiin C/raxmaan Odowaa iyo Cabdi Saabir, waxay wadaa olole ay uga hortegayaan qorshaha xukuumadda ku dooneyso inay Galmudug yeelato madaxweyne taabacsan Villa Somalia, waxayna u badan yihiin xildhibanno ka horjeeda madxda dowladda Somalia.
Xildhibaannadii kale ee ku sugnaa Magaalada Gaalkacyo sida Cabdi Qeybdiid, Mahad Maxamed Salaad iyo xubno kale ayaa maanta tagaya magaalada Cadaado, iyagoo ku biiri doona xildhibaannada saaxiibadood ah iyo madaxweyne Xaaf, halkaasoo lagu dejinayo qorshaha looga hortegayo rabitaanka dowladda Somalia.
Waxaa isla maanta gaaray magaalada Cadaado xildhibaanno uu hoggaaminayo Wasiiru Dowlaha Howlaha Guud iyo Guryeynta ee Xukuumadda Soomaaliya Axmed Qoorqor oo iyaguna iska xaadiriyey magaalada Cadaado.
Dhinaca kale waxaa soo baxaya warar sheegaya in Ra’iisal wasaare Kheyre iyo wafdigiisa ay tegi doonaan magaalada Cadaado, waxaana Kheyre la socda xildhibaano iyo xubno ka tirsan labada Gole ee taageersan xukuumadda Somalia.
Cadaado oo lagu dhisay Maamulka Galmudug, waxay mar kale fursad kale u heleuysaa nay noqoto meel u dhexeysa dhinacyada Galmudug, iyadoo madaxweyne Xaaf oo ka tegay uu hadda dib ugu laabtay, waxaana marka hore in laga heshiiyo u baahan qaabka doorashada Galmudug u dhaceyso oo ah qodobka kaliya ee la isku wada waafaqsan yahay.
