Soomaaliya ayaa ka mida dalalka loogu deeqay tallaalka Cudurka Covid-19 ee ka mida mshruuca COVAX oo ah mashruuc ay samaysay Hay’adda Caafimaadka Adduunka WHO, Isbahaysiga Tallaalka GAVI iyo hay’ad kale oo lagu magacaabo Isbahaysiga Diyaargarowga Cudurrrada Faafa.
Dalalka Afrika ayaa inta badan helay tallaalkan oo dal kasta la siinayo 20% dadka dalkaasi nool, waxaana dalalka uu soo gaaray ka mida Jabuuti, Itoobiya iyo Kenya oo toddobaadkii hore heshay ilaa Hal milyan oo goojo oo tallaalka ah.
Tallaalkan oo ah nooca Oxford Astrazaneca ayaa lagu sameyeyay dalka India, waxaana wasirka arrimaha dibadda India Subrahmanyam Jaishankar uu shaaciyey 3-dii bishan Maarso in tallaalkii Soomaaliya laga qaaday dalka India, kuna sii jeedo Soomaaliya, balse waxaa la geeyay dalka Kenya.
Waxaa Soomaaliya loogu deeqay 300,000 Goojo oo ah qeybtii ugu horeysay ee tallaalka ay sugaysay Soomaaliya oo gaaraya 1 milyan iyo 200 kun, wuxuuna tallaalkani gaaray magaalada Nairobi 6-tii Bishan Maarso. Haddii Soomaaliya ay wada hesho 1.2 milyan ee tallaalka wuxuu taasi ku filan tahay 20% dadka Soomaalida ah.
Wasiirka Caafimaadka xukuumadda Federaalka Fowsiya Abukar ayaa sheegay in tallaalka loo geeyay dalka Kenya arrimo dhinaca farsamada ama Logistics-ka, iyadoo ay maamulayaan Hay’adaha UNICEF iyo WHO ee Qaramada Midoobay oo xarumahooda waaweyn ku yaallaan Nairobi.
Tallaalka ayaa ugu danbeyn la filayaa inuu Muqdisho soo gaaro saacadaha soo socda, iyadoo wararku sheegayaan in diyaargarow la’aan iyo Qorshe xumo ay qeyb ka tahay sababta Tallaalka Soomaaliya loo geeyay dalka Kenya.
Ma cadda si loo qeybin doono tallaalka Soomaaliya heshay, laakiin wasiir Fowsiya ayaa sheegeysa in la diiwaan geliyay sahqaalaha caafimaadka, laguna bilaabi doono iyaga.
