Sida madaxweynihii ka horeeyay ee Xasan Sheekh ayuu Madaxweynaha cusub ee Soomaaliya ku shaqeynayaa Hotel kiro maalmaha ugu horeeya ee xukuntiisa..!
Arrintan ayaa dad badan isaga qasan waxaana la oran karaa waa qabyo ka dhalatay dastuurka qabyada ee sida KMG ah o qoran, waxaana wehlisa in hab maamuuska madaxweyne iyo guddiyadda doorashooyinka aysan arrintaasi u dhigin qorshe cad.
Sida Soomaalidu degdegta uga sameysan tahay ay wax waliba u noqdeen qorshe la’aan ah, maxaa yeelay mar haddii madaxweynaha cusub xilka loo dhaariyo wuxuu noqonayaa madaxweyne rasmi ah, wuxuuna qaadanayaa awooddaha Madaxweynaha dalka uu leeyahay.
XIL WAREEJINTA IYO DHAARINTA MADAXWEYNAHA
Waxaa muuqata in la kala hormariyay laba arrimood oo ay ahayd inay mar qura wada dhacaan, dhaarta iyo xil wareejinta, waxaad dib u xusuusataa doorashadii madaxweyne Xasan Sheekh Maxamuud, habeenkii la dhaariyay waxaa khudbadii madaxweynihii laga guuleystay ee Sheekh Shariif ku jirtay in wixii hadda ka danbeeya uu madaxweynaha cusub mas’uul ka yahay ammaanka.
Taasi ma dhicin ee waxaa madaxweynihii la doortay la dejiyay Hotel Jazeera, halkaasoo uu ku shaqeeyay kuna sugnaa muddo toddobaad ah, waxaana la ogyahay in Alshabaab weerar ku qaadeen hotelka.
Waxay ahayd Madaxweynaha cusub aan lagu dhaarin fadhigii lagu doortay ee Baarlamaanka, oo la qabanqaabiyo maalin kale oo xil wareejinta iyo dhaartu dhacdo sida dunida kale u dhaqanto, ama haddiiba madaxweynaha la dhaariyay si toos ah madaxtooyada loo dejiyo iyadoo madaxweynihii hore qaab kale loo maamuusayo.
Dhaqanka soo noqnoqday iyo khaladka farsamo ee dastuuriga ah waa xaalad u baahan in degdeg wax looga bedelo si aysan u dhicin in madaxweyne sharci ah uu dibad joog ahaado isagoo sugaya inuu madaxweynihii hore banneeyo gurigii Villa Somalia.
Doorashada aan waqtigeeda ku dhicin ee xilliya dheer qaadatay, fowdada ka jirtay nidaamka doorashada iyo xaaladda dalka oo allow-sahalka ayaa keentay in xaaladu sidan u ekaato, laakiin laga yaabee in madaxweynaha soo socda uu ka badbaado.
FAAQIDAADDA GOOBJOOGE.COM
