Heshiiska cusub ee Doorashada 2020/2021 oo ay caawa magaalada Muqdisho ku gaareen Madaxweynaha Soomaaliya, Madaxweynayaasha Maamul Goboleedyada Dalka iyo Guddoomiyaha Gobolka Banadir oo uu wehliyo Sii-hayaha Ra’iisal wasaraha waxaa ku jira Qodob kaliya oo ka haray qodobadii ugu waaweynaa ee Madaxweyne Farmaajo uu ku lahaa Heshiiskii Doorashada Dhuusamareeb 3.
Heshiiskan cusub ayaa ka kooban 15 Qodob, wuxuuna meesha ka saaray nuxurkii heshiiskii Dhuusmareeb 3, iyadoo Madaxweyne Maxamed C/llaahi Farmaajo ka tanaasulay guud ahaan qodobadii uu watay oo ay ugu waaweyn yihiin, Guddiga Doorashooyinka, Degaanada Doorashada, tirada ergada iyo Xisbiyada.
Qodobka kaliya ee Madaxweyne Farmaajo ugu soo haray heshiiska cusub ayaa u qoran sidatan: ” Heshiiskan siyaasadeed waxaa loo gudbinayaa Baarlamaanka Federaalka si ay u meel mariyaan”.
Qodobkan ayaa shaki laga muujinayaa inuu Madaxweynaha u adeegsado inuu ku hor istaago heshiiska, iyadoo ay dhici karto in Baarlamaanku diido, laakiin xogta la helayo ayaa sheegeysa in Guddoomiye Maxamed Mursal Sheekh uu balanqaaday in Golaha Shacabka ansixinayo Heshiiska.
Beesha Caalamka ayaa dhinaca kale si weyn u taageereysa heshiiskan, waxaana ku adkaan doonta Golaha Shacabka inuu ka hor yimaado heshiiska cusub ee Doorashada, taasoo haddii ay dhacdo keeni doonta qalalaase siyaasadeed.
