Guddoomiyaha Golaha shacabka ee waqtgiisu dhammaaday Maxamed Mursal Sheekh wuxuu qaatay go’aan siyaasadeed oo mustaqbalkiisa siyaasadeed ku xiraya Madaxweynaha waqtigiisu dhammaaday ee Maxamed C/llaahi Farmaajo.
Arrintan waxay soo bilaabatay Dicembar 2018 markii uu Maxamed Mursal qabtay Mooshin xil ka qaadis Madaxweyne Farmaajo, waxaana uu xilligaasi wajahay cadaadis darran oo keenay in korontadii iyo biyihii laga gooyo gurigiisa ku yaallay Madaxtooyada, loona diiday inuu la kulmo xildhibaannada ilaa uu markii dambe ka guuray Madaxtooyada, una qaxay Hotel u dhow Garoonka diyaaradaha.
Arrintaas kadib waxaa Maxamed Mursal iyo Maxamed Farmaajo dhexdhexaadiyey Ra’iisal wasaarihii hore Xasan Kheyre, waxaana dhacday inay muddo qaadatay sidii ay isu fahmi lahaayeen labada mas’uul. Mursal waxaa loo adeegsaday awood iyo dhaqaale is barbar socda, isagoo markii danbe isu dhiibay Farmaajo, kuna shaqeynaya rabitaankiisa.
Gudoomiye Mursal oo degan dalka Turkiga oo safiir uu ka ahaa xilligii dowladii Xasan Sheekh wuxuu mar waliba xildhibaannada iyo siyaasiyiinta si cad ugu sheegi jiray inuu aad uga baqayo haddii ka horyimaado Farmaajo inuu awood u adeegsado, balse arrinta ugu weyn ay tahay taageero dhaqaale oo la siinayo.
Sidii la wada ogaa ee Mursal u maareeyay ridistii xukuumadii Kheyre 25 July 2020 waxay bannaanka soo dhigtay heerka uu gaarsiisan yahay xiriirka Maxamed Mursal iyo Maxamed Farmaajo, waxa uu sameyn karo si uu Farmaajo u raali geliyo. Waxaana Baarlamaanka 10-aad uu ka dhigay midkii ugu liitay muddooyinkan danbe.
Markii labaad ee mucaaradku ka quusteen Maxamed Mursal waxay ahayd markii ay ugu tageen Musharixiinta qaarkood inuu xilka Madaxweynaha la wareego si KMG ah, kadib 8-da Febraayo 2021, laakiin wuxuuu sheegay in Farmaajo dagaal ka xigo taas, isaguna aanu diyaar u ahayn dagaalkaasi, isagoo xusuusan wixii ku dhacay Disembar 2018, balse ay u qarsooneyd danaha dhaqaale.
Wax lala yaabo maaha inuu Maxamed Mursal weli dakanno siyaasadeed u galo Maxamed Farmaajo, kuna xiro mustaqbalkiisa siyaasadeed, kadib markii uu arkay in mucaaradka aysan awood milateri lahayn, inuusan adkeyn mowqifka Beesha caalamka iyo wixii dhacay 19-kii Febraayo 2021.
Arrinta kale ee Maxamed Mursal ku riixeysa Farmaajo waa inuu tartan siyaasadeed kala dhaxeeyo Madaxweynaha K/Galbeed C/casiis Lafta-gareen oo ay hal beel kasoo wada jeedaan, wuxuuna mar waliba ku qasban yahay inuu uga dheereeyo taageerada Farmaajo.
Xildhibaannada aan isku hubin inay doorashada soo socota dib u helayaan kuraasta ay ku fadhiyaan iyo Guddoomiye Mursal oo danihiisa siyaasadeed uu halis ku yahay C/casiis Lafta-gareen, marka lagu daro hubanti la’aanta heysata Maxamed Farmaajo waxay dhalisay in muddo kororsigu noqdo xalka ugu sahlan ee horyaalla.
