Xaliimo Ismaaciil Ibrahim (Yarey) waxay ka mid noqotay shaqsiyaadka ka dhex muuqda siyaasadda dalka kadib markii ay ka soo gashay dhinaca ururada bulshada rayidka ah, wuxuuna doorkeedu bilowday xillgii la xulayay Baarlamaanka Federaalka Soomaaliya 2012 oo ay madax ka noqotay guddi awood badnaa oo Q/Midoobay u xil saartay inuu hubiyo xubnaha Baarlamaanka ka mid noqonaya.
Shaqsiyadda Xaliimo yarey ka sokow inay ka mid tahay haweenka fara-ku-tiriska ah ee hamiga siyaasadeed ka leh dalka, waxay ku fashilantay inay ka mid noqoto golaha wasiirada xukuumadda Soomaaliya oo dadaal badan ay u gashay sida weriyaha weyn ee Yuusuf Garaad, balse waxaa labadaba oo beel qura ka soo wada jeeda caqabad ku noqday miisaanka beeleed ee lagu afjaro jagooyinka waaweyn ee qaranka.
Mar kale waxay Xaliimo yarey ku soo laabatay ururada bulshada rayidka iyadoo lugna kula jirtay dhinaca siyaasadda oo ay gacan-saar weyn la yeelatay madaxweyne Xasan Sheekh iyo kooxda u dhow, waxayna mar kale madax u noqotay guddigii farsamada ee dhismaha maamulka Galmudug oo ahaa shaqadii ugu dambeysay ee ay soo qabatay. Guddigaas oo caqabado badan kasoo wajaheen waxay ugu danbeyn ku guuleysatay inay ka soo dhalaasho howshii loo diray, taasoo dhalisay in Madaxweyne Xasan Sheekh iyo Wasiirkiisa arrimaha gudaha C/raxmaan Odowaa ay taageero buuxda la garab istaagaan.
Ka mid noqoshada Xaliimo Yarey ee guddiga Doorashooyinka oo weli muran badan ka taagan yahay waxaa u soo magacaabay oo sabab u ahaa madaxweyne Xasan Sheekh oo xiriir gaar ahi ka dhaxeeyo olole balaaran ayuuna u galay inuu Baarlamaanku ansixiyo kadib markii xildhibaano badan ka hor yimaadeen in lagu soo daro Guddiga Doorashada.
Shalay oo taariikhdu ahayd 27-ka July 2015 ayaa Xaliimo Ismaaciil loo doortay inay noqoto Guddoomiyaha Guddiga Doorashooyinka, haddaba hoos ka akhriso taariikh nololeedkeeda.
Maxaad ka taqaan Xaliimo Yarey
Xilalkii ugu danbeeyay
Xaliimo Ismaaciil Ibrahim(Yarey) waxaa ay baratay cilmiga beeraha, iyadoo shahaadooyin ka qaadatay Jaamacadda Ummadda iyo Jaamacad ku taalo dalka Talyaaniga.
Waxay ka qalin jebisay sanadkii 1981 Jaamacadda umadda Soomaaliyeed, iyadoo baratay Cilmiga beeraha.
Waxay Shahaadada Master-ka ee cilmiga dhaqaalaha iyo Beeraha ka qaadatay Jaamacadda Turino ee dalka Talyaaniga 1984.
Khibrad Shaqo
- Isu duwe Goboleedka ee hay’adda talyaaniga ah ee samafalka CISP.
- Xiriiriyaha Bulshada ee xafiiska Qoyska iyo caruurta ee gobolka Miniblis-Minesota 2000-2007
- Guddoomiyaha Guddiga Farsamada Maamul u sameynta Gobolada Dhexe
- Guddoomiyaha Midowga Ururada bulshada ee Soomaaliyeed
- Gudoonka Guddigii Farsamada ee xulista iyo baarista Baarlamaanka Federaalka Soomaaliya.
- Guddoomiyaha guddiga Madax-banaan ee doorashooyinka Qaranka.
Luqadaha ay ku waxaa ka mida Talyaaniga, Ingiriiska iyo luqadeeda hooyo ee Soomaaliga.
Xaliimo yarey waxaa lagu tilmaamaa haweeney hal-adag oo leh karti waxqabad balse talo-qaadashada aan jecleyn, guddiga xasaasiga ah ee hadda ay xilkiisa qabatayna waa meel ay Soomaali badan raadinayeen, lase arki doonee sida ay xilkan culus u gudato haddiiba sidii loogu talogalay ay u suuragasho inuu shaqeeyo.
Diyaarintii bahda Wadani online
Xuquuqdu waxay u dhowran tahay Wadani.com
[ad name=”HTML-1″]
